Policia e Durrësit ka vënë në pranga një 29-vjeçar suedez, i cili u kap duke lëvizur me armë zjarri pa leje. Gjatë kontrollit të çantës që mbante me vete, shërbimet policore gjetën një pistoletë dhe karikatorin e saj të mbushur me fishekë, të cilat u sekuestruan në cilësinë e provës materiale.
“U arrestua në flagrancë shtetasi suedez, O. K., 29 vjeç, pasi gjatë kontrollit në çantën (marsup) që mbante me vete, u gjet 1 armë zjarri (pistoletë) me karikator të mbushur me fishekë, që posedoheshin pa leje;”, njofton policia.
Në një tjetër rast, policia parandaloi vjedhjen e një kasaforte murale. Në afërsi të banesës ku ndodhej kasaforta u arrestua në flagrancë një 24-vjeçar, i dyshuar si një prej autorëve të tentativës së vjedhjes.
Nga hetimet e kryera pas ngjarjes, policia identifikoi edhe dy bashkëpunëtorët e dyshuar, përkatësisht një 38-vjeçar dhe një 26-vjeçar. Njëri prej tyre u ndalua nga shërbimet policore, ndërsa vijon puna për kapjen e bashkëpunëtorit tjetër.
“U arrestua në flagrancë, në afërsi të banesës, ku kishte tentuar të vidhte një kasafortë murale, shtetasi D. P., 24 vjeç, ndërsa nga hetimet e kryera për këtë rast, u identifikuan 2 bashkëpunëtorët e tij, shtetasit V. K., 38 vjeç dhe S. I., 26 vjeç. Si rezultat i veprimeve të shpejta policore, u mundësua ndalimi i shtetasit V. K., ndërkaq punohet intensivisht për kapjen e shtetasit S. I..”
Policia bën me dije se kontrollet dhe patrullimet do të vijojnë në zonën e Plazhit të Durrësit, në kuadër të planit të posaçëm të masave për sezonin turistik. (A2 Televizion)
A2 CNN Livestream
MUND TE LEXONI GJITHASHTU
