Një 39-vjeçar në Vlorë është vënë në pranga nga policia pasi dogji makinën e një polici, me porosi të një personi tjetër.
Policia e Vlorës ka vënë në pranga një 39-vjeçar pasi dogji makinën e efektivit të policisë Denis Prifti, me porosi të një personi tjetër.
A2 CNN raporton se 39-vjeçari Albano Merkaj u porosit nga 35-vjeçari Ledio Hajdini për të djegur makinën e efektivit, në këmbim të 1 milion lekëve. Ky i fundit ndodhet në burg pasi është arrestuar pasi theu masën e sigurisë arrest në shtëpi.
Nga hetimet rezulton se më 14 prill, autori ka djegur automjetin “Ford C-Max” të policit, ndërsa nga flakët është dëmtuar edhe një tjetër makinë e parkuar pranë saj.
Dyshohet se ngjarja lidhet me një operacion policor të mëparshëm, gjatë të cilit u ndalua porositësi për shkelje të masës së sigurisë.
Njoftimi i Policisë Vlorë / Finalizohet operacioni policor i koduar “Porosia”.
Policia zbardh dhe dokumenton në kohë të shpejtë djegien e qëllimshme të automjetit në pronësi të një punonjësi policie.
Si pasojë e zjarrit u përfshi nga flakët dhe një automjet tjetër.
Identifikohet, kapet dhe ndalohet autori i dyshuar i zjarrvënies.
Gjithashtu është dokumentuar me prova ligjore dhe porositësi për djegien e automjetit, i cili ndodhet me masë sigurie "Arrest në shtëpi".
Sekuestrohet, në cilësinë e provës materiale, automjeti me të cilin lëvizte autori i dyshuar.
Si rezultat i veprimeve hetimore intensive dhe profesionale, shërbimet e Policisë bënë të mundur identifikimin, kapjen dhe ndalimin e shtetasit A. M., 39 vjeç, banues në Vlorë, person me precedent kriminal, si autor i dyshuar i zjarrvënies.
Nga hetimet rezulton se ky shtetas më datë 14.04.2026, ka djegur automjetin e markës “Ford C-Max”, në pronësi të punonjësit të Policisë D. P.
Si pasojë e përhapjes së flakëve, është përfshirë dhe është dëmtuar edhe një automjet tjetër i markës “Mercedes-Benz”, në pronësi të shtetasit R. K.
Në vijim të veprimeve hetimore, është bërë identifikimi i porositësit të dyshuar të kësaj ngjarjeje, shtetasit L. H., 35 vjeç, banues në Vlorë, i cili aktualisht ndodhet me masë sigurie “Arrest në burg”.
Nga hetimet paraprake dyshohet se kjo ngjarje ka lidhje me një operacion policor të datës 02.04.2026, gjatë të cilit shërbimet e forcës së posaçme “Shqiponja”, ndër të cilët ishte edhe punonjësi i Policisë D. P., kanë kapur në flagrancë shtetasin L. H., pasi kishte thyer masën e sigurisë “Arrest në shtëpi”, të caktuar nga Gjykata për veprën penale “Prodhimi dhe shitja e narkotikëve”.
Në bashkëpunim me Prokurorinë vijojnë veprimet hetimore për dokumentimin e plotë të kësaj veprimtarie kriminale dhe për implikimin e personave të tjerë të mundshëm.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprën penale “Shkatërrimi i pronës me zjarr”, kryer në bashkëpunim. (A2 Televizion)
A2 CNN Livestream
MUND TE LEXONI GJITHASHTU
