Një 45-vjeçar nga Tirana, i shpallur në kërkim ndërkombëtar nga autoritetet italiane, është arrestuar nga Policia e Shtetit në kuadër të një operacioni të koduar “Operacionalja 37”.
Operacioni është zhvilluar nga Drejtoria e Forcës së Posaçme Operacionale, në bashkëpunim me FAST Albania dhe Rrjetin Evropian të Njësive për Kërkimin e Personave në Arrati (ENFAST), dhe u finalizua me lokalizimin dhe ndalimin e shtetasit G. B., alias E. P., 45 vjeç, banues në Tiranë.
Sipas njoftimit zyrtar, Gjykata e Apelit në Napoli, Itali, ka lëshuar një urdhër arresti për këtë shtetas, për veprat penale “Grup kriminal”, “Trafikim lëndësh narkotike” dhe “Falsifikim dokumentash”, në bazë të legjislacionit penal italian.
Arrestimi u krye me qëllim ekstradimin e tij drejt Italisë, ndërsa Interpol Tirana është në komunikim të vazhdueshëm me Interpol Romën për të përmbyllur procedurat ligjore të ekstradimit.
Operacioni “Operacionalja 37” është pjesë e serisë së aksioneve të ndërmarra së fundmi nga Policia e Shtetit për kapjen e personave në kërkim ndërkombëtar. (A2 Televizion)
A2 CNN Livestream
MUND TE LEXONI GJITHASHTU
