“Çmontohen” 253 lokale ku organizoheshin lojëra fati, 116 të arrestuar dhe mijëra euro e paund të sekuestruara

Drejtori i policisë së shtetit, Muhamet Rrumbullaku, në një konferencë për mediat ka zbuluar detaje nga operacioni “Sundimi i ligjit”, kundër organizimit të kundërligjshëm të lojërave të fatit.

Operacioni u shtri në dy faza dhe u zhvillua nga data 25 nëntor deri në datë 30 nëntor, e nga 1 dhjetori deri në mbrëmjen e datës 6 dhjetor. Gjatë tij, u kontrolluan 1895 shtetas dhe 1078 lokale, ku 253 prej tyre u konstatuan se kanë shërbyer si baza ku janë organizuar lojëra fati.

“Si rezultat i këtyre kontrolleve, u evidentuan dhe u goditën 181 raste, për të cilat u proceduan penalisht 210 shtetas, nga të cilët: 116 shtetas u arrestuan në flagrancë, 89 shtetas u proceduan në gjendje të lirë, si dhe vijon puna për kapjen e 5 shtetasve të tjerë. Vetëm gjatë mbrëmjes së djeshme, janë arrestuar 102 shtetas dhe janë proceduar në gjendje të lirë 68 të tjerë. Gjatë kontrolleve, u sekuestruan: 4 tavolina për lojën Poker, me valixhe me çipsa dhe me letra bixhozi, 184 celularë, 25 njësi kompjuterike, zara, 174 000 lekë, 20 434 euro dhe 11 360 paund që i shërbenin lojërave të fatit, si dhe sasi cannabisi, municion luftarak, 1 pistoletë pneumatike, 1 mjet prerës (thikë) dhe 1 automjet”, thuhet në njoftim.

Në bashkëpunim me prokuroritë e Juridiksionit të Përgjithshëm, vijon puna për identifikimin dhe nxjerrjen para përgjegjësisë penale, dhe të shtetasve të tjerë të implikuar në këtë veprimtari të kundërligjshme. (A2 Televizion)