Gjykata e Apelit ka vendosur këtë të premte të rrëzojë kërkesën e SPAK për rikthimin në “arrest shtëpiak” për kryetarin e Partisë Demokratike, Sali Berisha, duke vendosur një tjetër masë sigurie.
Apeli ka vendosur për ish-kryeministrin masën e sigurisë "detyrim paraqitje". Sipas këtij vendimi, Berisha do të duhet të shkojë në SPAK për tu paraqitur para oficerit të policisë gjyqësore, 2 herë në muaj.
Avokati i ish-kryeministrit Sali Berisha, Genc Gjokutaj është prononcuar për mediat pas seancës, duke sqaruar vendimin e Apelit të Posaçëm.
Gjokutaj tha se vendimi i sotëm është i paqartë, pasi nuk kishte ndonjë kërkesë tjetër nga prokurori në seancë përveç asaj për rivendosjen e masës së sigurisë “arrest në shtëpi”.
“Në një vendimmarrje të çuditshme Gjykata e Apelit mbi ankimin e prokurorit, me bazën e një vendimi të gjykatës së shkallës së parë për revokimin e masës së sigurisë “arrest shtëpie” për zotin Berisha vendosi kryesisht zëvendësimin masës. Ne jemi të paqartë me këtë vendim, për shkakun e vetëm sepse objekti i këtij gjykimi ishte kërkesa për shfuqizimin e vendimit të Shkallës së Parë. Ndërkohë që nuk kishte një kërkim tjetër nga prokurori. As në sallën e gjyqit, ai i qëndroi arrestit në shtëpi. Nëse do të kishte kërkim nga prokurori, të gjendej rruga ligjore për zëvendësimin e masës së sigurisë, por nuk ishim në këto kushte”, tha Gjokutaj.
Ish-kryeministri Berisha u la i lirë një muaj më parë pas qëndrimit për rreth 1 vit në arrest shtëpie. Ai akuzohet nga SPAK si i përfshirë në dosjen “Partizani”, ku njëherësh i akuzuar është edhe dhëndri i tij, Jamarbër Malltezi.
Prokuroria e Posaçme e mori të pandehur Berishën nën akuzën e korrupsionit pasiv. Ai akuzohet se ka ndërmarrë veprime konkrete në miratim ligjesh dhe aktesh nënligjore, për t’i përshtatur sipas nevojave të pesë familjeve pronare në kompleksin sportiv “Partizani”.
(A2 Televizion)
A2 CNN Livestream
MUND TE LEXONI GJITHASHTU
