Më tepër detaje janë zbuluar nga ngjarja e ndodhur një ditë më parë në Vlorë ku u vetëplagos 37-vjeçari Skerdi Mehmetaj (alias Piperi).
Burime brenda policisë së Vlorës bëjnë me dije se arma e zjarrit ka qenë pa leje, ndaj për këtë arsye policia e ka arrestuar 37-vjeçarin për armëmbajtje pa leje.
Ndërkohë, sipas burimeve nga grupi hetimor për A2 CNN, 37-vjeçari pasi është vetëplagosur jashtë ambienteve të lokalit në zonën e Lungomares, ka hedhur armën e zjarrit brenda një makine tip “Audi” me ngjyrë të bardhë që ishte aty pranë.
Ai e ka hedhur armën aty për t’i shpëtuar veprës penale të "armë mbajtjes pa leje". Mehmetaj ka shkuar vetë më pas në spital i plagosur pasi plumbi e ka kapur në pjesën e këmbës.
Në spital ka konfirmuar ngjarjen duke dhënë dëshmi përpara grupit hetimor dhe duke thënë se është vetëplagosur. Burimet nga grupi hetimor bëjnë me dije se në dëshminë e tij, 37-vjeçari ka deklaruar se armën e zjarrit e mbante për mbrojtje, pasi ndihej i kërcënuar për shkak të konflikteve që mund të ketë patur në të shkuarën.
Kësaj dëshmie i janë bashkuar dhe të tjera detaje në të shkuarën e tij për të cilat policia mbetet e rezervuar, por ai mbetet një figurë e njohur për blutë e Vlorës dhe Selenicës. E shkuara e tij e errët ka qenë një ndër faktorët përse ka ndryshuar dhe mbiemrin. (A2 Televizion)
A2 CNN Livestream
MUND TE LEXONI GJITHASHTU
