Gjykata e Posaçme e Apelit rrëzoi kërkesën e ish-deputetit të PS, Jurgis Çyrbja, për shuarje të masës "arrest në burg". Çyrbja vuajti një dënim 2 vite burg, pasi u fajësua për "korrupsion në zgjedhje", "përkrahje të autorit të krimit" dhe "tregim të sekretit shtetëror". Në Apel mbrojtja e Çyrbjes ka pohuar se dënimi i klientit të tij përfundon sot, 20 shkurt, ora 22:30. Për këtë shkak, për të shuar masën ish-deputetit do t'i duhet t'i drejtohet me një tjetër kërkesë gjykatës.
“Gjykata e Posaçme e Apelit për Korrupsionin dhe Krimin e Organizuar, me trup gjykues të përbërë nga gjyqtarët Daniela Shirka (kryesuese), Florjan Kalaja (anëtar) dhe Tereza Merkaj (anëtare), sot më datë 20.02.2026, disponoi për çështjen penale nr. 73 akti, datë 18.02.2026 regjistrimi, mbi kërkesën e të pandehurit J.Ç, me objekt: “Shuarjen e masës së sigurimit “Arrest në burg”, caktuar me vendimin nr. 126, datë 20.10.2024 të Gjykatës së Posaçme të Shkallës së Parë për Korrupsionin dhe Krimin e Organizuar, verifikuar me vendimin nr. 129, datë 22.10.2024 të kësaj gjykate, për shkak të përfundimit të dënimit të dhënë me vendimin nr. 68, datë 03.11.2025 të Gjykatës së Posaçme të Shkallës së Parë për Korrupsionin dhe Krimin e Organizuar”, si vijon: - Rrëzimin e kërkesës së kërkuesit J.Ç. U shpall në Tiranë, sot më datë 20.02.2026”, thuhet në njoftim. (A2 Televizion)
A2 CNN Livestream
MUND TE LEXONI GJITHASHTU
