Eurodeputeti Aleksandër Spasov është shprehur se progresi i Shqipërisë në rrugën e anëtarësimit drejt Bashkimit Europian, është më i miri në krahasim me vendet e tjera të Ballkanit Perëndimor.
Komentet Spasov i bëri teksa ishte i ftuar në ‘Ditari i Fundjavës’ me gazetarin Erion Dushi në A2 CNN, ku tha se kishte besim për integrimin e Shqipërisë, por edhe të vendeve të tjera të rajonit, deri në vitin 2030.
Ai tha gjithashtu se Maqedonia e Veriut kishte ngecur disi në rrugën e negociatave, për shkak të disa ndryshimeve që duheshin implementuar në lidhje me minoritetin bullgar në vend.
Spasov shtoi se qytetarët e Shqipërisë, por edhe të vendeve të tjera të rajonit kanë nevojë për të parë reforma konkrete, në mënyrë që të vijojnë të suportojnë rrugën drejt Bashkimit Europian.
“Për fat të keq, Maqedonia e Veriut ka ende disa detyra për të implementuar, të propozuara edhe nga Presidenca franceze. Disa ndryshime në legjislacion dhe Kushtetutë përsa i përket minoritetit bullgar në vendin tonë. Shpresoj që ky proces të ecë në të ardhmen dhe të ecim drejt BE.
Përsa i përket Shqipërisë mendoj se është në rrugën e duhur. E shoh tepër pozitiv dhe të shpejtë progresin në këtë rrugëtim. Kjo është diçka që më gëzon dhe shpresoj që të vijojë të jetë e tillë.
Personalisht jam i bindur se pjesa më e madhe e vendeve nga rajoni jonë i Ballkanit Perëndimor, do të kenë mundësinë që të futen sëbashku në BE brenda vitit 2030. Por duhet të punojmë më shumë me hapa dhe reforma konkrete drejt rrugës së BE-së. Njerëzit kanë nevojë për reforma konkrete, për të suportuar rrugën drejt BE-së”, tha Spasov, shkruan A2 CNN.
(A2 Televizion)
A2 CNN Livestream
MUND TE LEXONI GJITHASHTU
