Sezoni i ri parlamentar, me një mazhorancë që zyrtarisht është vetëm një votë larg shumicës së cilësuar, do të jetë një realitet i ri parlamentar edhe për vetë socialistët. Për numrin dy të selisë rozë, Blendi Klosi, mandati i katërt qeverisës do të jetë në shërbim të integrimit europian dhe jo një mekanizëm për të treguar arrogancë me pushtetin. Pavarësisht se është i vetëdijshëm që 83 mandate në sallën e Kuvendit do ta lehtësojnë projektin qeverisës të Edi Ramës.
“Objektivi ynë që brenda vitit 2027 të mbyllim negociatat me BE-në do të kërkojë një punë të madhe parlamentare, miratim ligjesh, miratim aktesh. Kjo padyshim do të ndihmohet nga një numër i lartë deputetësh, por sërish e theksoj se nuk ka të bëjë me forcën e kartonit, por me forcën e njerëzve,” tha Klosi.
Deri më tani duket se socialistët nuk do t’i shfrytëzojnë votat e tyre për të bërë një kod të ri zgjedhor të njëanshëm. Sipas Sekretarit të Përgjithshëm të PS-së, amendimi i dokumentit që vendos rregullat e lojës për zgjedhjet duhet të bëhet me konsensus me opozitën dhe jo me forcën e kartonit, shkruan A2 CNN.
“Kodi zgjedhor është një kod i cili kërkon konsensus, më shumë sesa numrin e 84 votave, pasi nuk është një kod që ka të bëjë me ndërtimin e një institucioni të caktuar, por ka të bëjë me dakordësinë e forcave politike në garën elektorale, ku forcat politike të jenë të baraslarguara nga sistemi zgjedhor dhe të gatshme të pranojnë sistemin, garën dhe rezultatin,” u shpreh Klosi.
Ai ka gjithashtu një kërkesë për kolegët e majtë dhe të djathtë: t’i japin fund praktikës së minutës së fundit për të ndryshuar këtë ligj të rëndësishëm.
“Do të ishte fantastike që që në nisje të sezonit të ri politik të kishim një kod elektoral të miratuar dhe të dakordësuar, dhe të mos ngelin gjërat në minutën e fundit, sepse jeta politike dhe parlamentare ka treguar se këto zgjidhjet e minutës së fundit krijojnë gjithmonë anomali në proces dhe në dakordësinë për procesin.”
Përveç sfidave parlamentare, pas pushimeve të verës, socialistët po përgatiten edhe për procesin e ndryshimeve brenda partisë.
“Shtatori si gjithmonë ka qenë momenti ku, së bashku me grupin e ri parlamentar, qeverinë e re të dalë nga 11 maji, do të analizohen, gjykohen dhe do të vlerësohen të gjitha forumet e PS-së.”
Pavarësisht emrave që do të shpërblehen nga Edi Rama pas fitores së katërt të 11 majit, Blendi Klosi thotë se PS ka nisur punën për zgjedhjet e ardhshme parlamentare.
“Po e them publikisht: kemi filluar punë për mandatin e pestë, për zgjedhjet e vitit 2029.” (A2 Televizion)
A2 CNN Livestream
MUND TE LEXONI GJITHASHTU
