Situata pas koronavirusit/ Do të vijojë ndotja e mjedisit, edhe pse jo njësoj

Në dekadat e fundit, fatkeqësitë natyrore me të cilat përballet njerëzimi, sa vijnë dhe shtohen duke marrë qindra-mijëra jetë njerëzore si pasojë e forcës shkatërrimtare të natyrës. Fatkeqësi të tilla si cuname, tërmete, përmbytje, zjarre masive dhe pandemi të ndryshme.

Por, a është Covid-19 një armik natyror i njerëzimit apo është vetëm një bumerang i sjelljes njerëzore ndaj natyrës?

Ka një lidhje të afërt mes tyre; është ndotja e mjedisit, ndotja e ujit që pijmë, ndotja e ajrit që mushkëritë tona thithin cdo ditë. Është ajri i ndotur që vret në mënyrë "të heshtur" rreth 4,2 milion jetë çdo vit në shkallë globale. Dhe është pikërisht Kina, e cila mban rekordin e vdekjeve prej 1,1 milion persona në vit, vetëm si pasojë e ajrit të ndotur që thithin qytetarët e zonave industriale. 

Përtej heshtjes zyrtare, ndotja në Kinë është 10-fishi i normës së lejuar nga Organizata Botërore e Shëndetësisë, normë e cila është 10 mikrogramë/m3. Kina, me masat 3-mujore ndaj Covid-19, vlerësohet të ketë shpëtuar rreth 50 mijë njerëz të llogaritur të vdekur për shkak të ndotjes së lartë. Rast i ngjashëm me Lojërat Olimpike “Pekin 2008”, të cilat detyruan qeverinë kineze të ndalojë disa industri për siguruar ajër të shëndetshëm gjatë Lojërave Olimpike dhe për rrjedhojë, numri i vdekjeve nga ndotja u ul me 50 mijë persona atë vit.

Përtej Azisë, shumë pranë, është një tjetër zonë me ndotje shumë të lartë të ajrit dhe është pikërisht Italia Veriore, ku popullsia e saj prej disa dekadash është ekspozuar në nivele të larta të grimcave dhe smogut industrial. Ndotja, e cila edhe gjatë dimrit, në disa qytete arrin 10-fishin e normës së lejuar prej 10 mikrogram/m3, duke shkaktuar mesatarisht 60 mijë humbje jete në vit; fatalitete këto shumë më të larta se parashikimi më pesimist i Covid-19 për Italinë. 

Nëse për një moment do të harrojmë pandeminë për të cilën bota ka ndaluar, mund të themi se pastrimi i ajrit do të shpëtojë mijëra jetë njerëzore, por pandemia është mënyra e gabuar për të shpëtuar popullsinë globale nga ndotja e ajrit .

Pas Covid-19, shoqëria njerëzore do të duhet të mësojë ritme të tjera jete, metoda të punës “online” apo teknologji miqësore me mjedisin dhe me natyrën.  (A2 Televizion)