Partia Demokratike është shprehur se “tërmeti i 26 nëntorit të vitit të kaluar nxori në pah se shqiptarët drejtohen nga një qeveri jo vetëm e paaftë, por edhe nga pushtetarë hajdutë”.
“1 vit pas tërmetit, nuk ka asgjë të ndërtuar. Zona “5 Maji” në Tiranë është modeli tipik i dështimit të qeverisë për të ndërtuar në kohë banesat e qytetarëve të prekur nga tërmeti dhe modeli se si hajdutët e fatkeqësisë nuk ndalen para asgjëje për të vjedhur edhe lekët e shtëpive të tërmetit. Në zonën “5 Maji” është vendosur të ndërtohen 12 godina banimi dhe shërbimesh me vlerë 52 milionë euro. Këto pallate duhet të ishin sot drejt fundit dhe qytetarët duhet të ishin duke u bërë gati të hynin në shtëpitë e reja. Kjo nuk ka për të ndodhur edhe për të paktën 2 vjet të tjera, sipas kontratës së lidhur nga Bashkia e Tiranës. Në vend të shërbimit me cilësi dhe shpejtësi, Erion Veliaj ka zgjedhur të harxhojë kohën duke gjetur forma ekstraligjore për të shpenzuar dhjetëra miliona euro nga fondet e rindërtimit. Shumëkush mund të çuditet, por për 52 milionë euro që do të harxhojë këtu Erion Veliaj dhe Edi Rama nga taksat e qytetarëve, nuk ka një tender të veçantë për projketimin e banesave në zonën "5 Maji". Bashkia e Tiranës ka shpikur një mënyrë të re për t’i vjedhur ato. Praktikisht, kanë dhënë edhe tërmetin me PPP. Projekti i zbatimit të ndërtimit të 12 godinave të reja te banimit do të realizohet nga vetë ndërtuesi i këtyre godinave. Është njësoj si ta japësh me PPP. Ai që projekton, ai ndërton, ai zbaton. Fusha e abuzimit është lënë e stërmadhe në dorë të kompanisë ndërtuese, pa asnjë kontroll. Janë 52 milionë euro që do të hidhen në 12 godina të përqendruar në dorën e ndërtuesit. Kjo zgjedhje ekstraligjore ka vetëm një shpjegim: korrupsionin dhe vjedhjen me fondet e rindërtimit”, lexohet në deklaratën e PD-së.
“Sot, çdo shqiptar e di se PPP- të e kësaj qeverie janë projekte abuzimi, mashtrimi dhe korrupsioni. Çmimet fryhen, që fitimi nga vjedhja të jetë sa më i madh. Kjo ka ndodhur edhe më këtë PPP të fatkeqësisë, ku i është lënë dorë projektimi dhe ndërtimi, të njëjtës kompani. Çmimi është gati dyfishuar. Sipas standardeve që vetë shteti përdor, përmes Entit Kombëtar të Banesave, çmimi për ndërtim i një metri katror është rreth 320 mijë lekë. Sa na kushton kjo me Erion Velinë dhe procedurat korruptive të ndjekura për të zhvatur fondet e rindërtimit? Hajdutët e fatkeqësisë i kanë rritur pothuajse dyfish. Sipas letrave që ka bërë bashkia e Erion Velisë, 1 m2 te zona "5 Maji" do të kushtojë rreth 580 mijë lekë, nga 320 mijë që po shteti, me Entin Kombëtar të Banesave, ndërton rëndom”, shton PD-ja. (A2 Televizion)
A2 CNN Livestream
MUND TE LEXONI GJITHASHTU
