Paris Saint-Germain siguroi kualifikimin për në finalen e Ligës së Kampionëve pas një fitoreje 2-1 në ndeshjen e kthimit ndaj Arsenalit në “Parc des Princes”, duke mbyllur gjysmëfinalen me rezultatin e përgjithshëm 3-1. Skuadra e Luis Enrique bëhet kështu ekipi i tretë nga Ligue 1 që arrin në më shumë se një finale në historinë e kompeticionit, pas Stade de Reims dhe Olympique de Marseille.
Pas fitores minimale në ndeshjen e parë në Londër, PSG përballoi një fillim të vrullshëm të Arsenalit. Gabriel Martinelli dhe Martin Ødegaard rrezikuan që në minutat e para, por Gianluigi Donnarumma realizoi dy pritje spektakolare për të ruajtur portën e paprekur.
Pas presionit të parë, parizienët reaguan me forcë dhe paralajmërimi erdhi kur Kvaratskhelia goditi shtyllën. Goli i epërsisë erdhi nga një goditje e shkëlqyer e Fabián Ruiz, i cili shënoi me të majtën pas një topi të kthyer nga mbrojtja angleze, duke realizuar golin e tij të parë në Ligën e Kampionëve.
Në pjesën e dytë, Bukayo Saka ishte afër barazimit, por Donnarumma bëri sërish një pritje vendimtare. Më pas, një penallti për PSG-në pas një prekje me dorë nga Lewis-Skelly u prit nga David Raya, duke mbajtur gjallë shpresat e Arsenalit.
Megjithatë, Hakimi shënoi golin e dytë për PSG-në pas një gabimi të Parteyt, duke afruar francezët edhe më pranë finales. Arsenal reagoi me një gol të Saka-s pas asistit të Trossard, por sulmuesi anglez humbi një rast të artë për të barazuar.
PSG mban gjallë ëndrrën për trofeun e parë europian, ndërsa Arsenal regjistron eliminimin e gjashtë në Evropë pasi ka humbur ndeshjen e parë në shtëpi dhe rrezikon një tjetër sezon pa trofe. (A2 Televizion)
A2 CNN Livestream
MUND TE LEXONI GJITHASHTU
