Futbolli shqiptar ka nevojë për më shumë promovim dhe për një mënyrë të re për të afruar tifozët në stadiume. Kështu u shpreh gazetari sportiv Gjergji Stefa, i ftuar në emisionin “Megasport” me Altin Sulçen në A2 CNN.
Stefa tha se klubet shqiptare nuk po bëjnë sa duhet për të tërhequr vëmendjen e publikut, sidomos të të rinjve, përmes rrjeteve sociale dhe personazheve publikë.
Sipas tij, klubet duhet të investojnë edhe te influencerët, gazetarët dhe artistët, të cilët mund të ndihmojnë në promovimin e ndeshjeve dhe kampionatit.
“Në çdo ligë të botës ka një fond i cili quhet fondi influencer, ku njerëz të caktuar bëjnë influencë për kampionatin. Këta mund të jenë gazetarë, artistë e të tjerë”, tha Stefa.
Ai solli edhe një shembull nga përvoja e tij në rrjetet sociale, duke thënë se një video e publikuar prej tij nga një turne ndërkombëtar mori më shumë se 50 mijë shikime.
“Asnjë influencer nuk merret me kampionatin shqiptar, sepse drejtuesit e klubeve...” tha Stefa, duke ngritur pikëpyetje mbi mënyrën se si klubet po e promovojnë futbollin.
Gazetari theksoi gjithashtu se drejtuesit e klubeve duhet të kenë më shumë komunikim me mediat dhe personazhet që mund të ndihmojnë në promovimin e ndeshjeve.
“Unë jam i bindur që asnjë drejtues klubi nuk të ka marrë asnjëherë në telefon për të diskutuar mbi mundësinë e promovimit”, u shpreh ai.
Një tjetër problem, sipas Stefës, është mungesa e punës me të rinjtë dhe përdorimi i dobët i rrjeteve sociale.
“E treta është dixhitalizimi dhe marketingu me të rinjtë. Nuk bëhet asnjë lloj pune për ta dixhitalizuar kampionatin”, tha gazetari. (A2 Televizion)
A2 CNN Livestream
MUND TE LEXONI GJITHASHTU
