Dy ndeshjet e para në Grupin K kualifikues të Botërorit 2026 dhanë konfirmime të qarta. Anglia mbetet skuadra më e mirë dhe rivalët direkt të Shqipërisë do të jenë serbët.
Pikërisht ndaj tyre do të përqendrohet lufta për vendin e dytë, që përkthehet në kualifikim në fazën play-off drejt Botërorit 2026, shkruan A2. Momentalisht, anglezët kryesojnë me 6 pikë të plota, ndërsa kuqezinjtë janë në vendin e dytë me 3 pikë, po aq sa ka edhe Letonia, por me golavarazh më të mirë.
Serbia, e angazhuar në duelet me Austrinë në Nations League, ku siguroi qëndrimin në Ligën A, nuk ka luajtur ende asnjë ndeshje kualifikuese. Dueli i 7 qershorit në Tiranë kundër Kombëtares kuqezi do të shënojë debutimin e tyre në turne.
Ajo përballje shihet pikërisht edhe si e para nga dy finalet në luftën për vendin në play-off e Botërorit. Shqipëria ka si rival direkt serbët në këto kualifikuese dhe ajo ndeshje në Arenën Kombëtare do të përbëjë udhëkryqin e parë të edicionit.
Më pas, sipas kalendarit, pas dy sfidave me Letoninë, djemtë e Sylvinhos do të luajnë në trasfertë me Serbinë më 11 tetor. Këto janë duelet që do të vendosin fatin e kualifikueseve për Kombëtaren. Ëndrra për të siguruar pjesëmarrjen e parë historike në Kupën e Botës, kalon pikërisht nga ato përballje me rivalët historikë, që këtë herë janë edhe kundërshtarë direkt.
Ndeshja e fundit ndaj Anglisë më 16 nëntor, më tepër sesa shpresë për të marrë pikë, do të jetë mënyra për mbyllje prestigjoze të eliminatoreve. (A2 Televizion)
A2 CNN Livestream
MUND TE LEXONI GJITHASHTU
