Ish-kapiteni i Kombëtares, Altin Lala, ka folur në prag të duelit që Shqipëria do të zhvillojë ditën e enjte ndaj Polonisë, të vlefshme për “play off”-in e Botërorit. Në një lidhje LIVE për emisionin “Mega Sport” nga Altin Sulçe, legjenda kuqezi, analizoi këtë përballje, teksa ndau mendimin se Muçi dhe Mehmeti e meritojnë që të luajnë titullar, me performancën që kanë treguar me klubet e tyre.
“Është një nga ndeshjet më të rëndësishme që ka pasur Kombëtarja në historinë e vetë. Kemi shanse të shkojmë në Botëror, janë 2 ndeshje, të vështira. Polonia është ndeshja e parë që duhet të luhet dhe të fitohet. Mendoj që shanset e kemi. Polonia do të ketë më shumë presion. Ne kemi vetëm çfarë të fitojmë nga kjo ndeshje. Shpresojmë që të gjithë çunat të jenë në formë dhe të kemi një ditë të mirë së bashku.
Muçi dhe Mehmeti, të dy lojtarët, kanë dhënë performancë jashtëzakonisht të mirë në skuadrat ku aktivizohen. Lojtarët që kanë formën më të mirë duhet të grumbullohen në Kombëtare dhe të kenë shanset e tyre dhe të luajnë nga fillimi. Të dy janë lojtarë cilësorë. Kanë rendiment dhe formë të mirë.
Silvinjo shpeshherë ka bërë surpriza në formacion, kur i gjithë publiku kanë pritur një lojtarë ose tjetrin, ai ka marrë vendimet e tij. Unë jo gjithmon kam qenë në të njëjtin mendim me 11-shen që ai ka aktivizuar. Por ai në fund të fare është trajneri dhe vendos. Jam kureshtar. Mendoj që Muçi dhe Mehmeti e meritonin ardhjen në Kombëtare dhe pse jo ndoshta mund të kemi ndonjë surprizë, Muçi ka shënuar gjithë ato gola.
Taktike është relative, ne duhet t’i ngushtojmë ato repartet me njëra-tjetreën, duhet ta mbajmë kundërshtarin larg 16-shes, sepse Levandovski është lojtar i rrezikshëm në zonë, ka dhe ai moshën e vetë. Shpresoj që me kundërsulmet tona t’i kemi shanset edhe të shënojmë pse jo. Ne duhet të guxojmë, është vetëm një lojë. Siç e thashë më përpara, Polonia e ka presionin. Mund të ketë hapësira, mund të luajë edhe Uzuni ose Broja përpara, lojtarë të shpejtë të cilët mund të rrezikojnë dhe të shënojnë.
Do jem në Poloni, patjetër. Unë kam qenë autentik, kam qenë gjithmonë i hapur edhe me tifozët. Jam munduar të jap maksimumin, kam marrë shumë nga tifozët.
Kam shpresë që lojtarët kyç të jenë në formë. Për mendimin tim Gjimshiti, Asllani, janë lojtarë shumë të rëndësishëm. Këta të dy janë një pikë kryesore e Kombëtares.
Basha dhe Abrashi kanë qenë dy shkatërrues mjaft të mirë pas meje, Abrashi më ka ngjasuar më shumë.
Unë blej biletat e mia dhe shkoj në çdo ndeshje të Hanoverit, jam prezent në stadium, jam afër klubit. Me presidentin kam marrëdhënie shumë të mira, jam si në shtëpinë time.
Jam aktiv me lojtarët, nuk kam agjensi të madhe, kam lojtarë të prespektivë. Është dhe Mario Dajsinani dhe Grei Kuqi nga Teuta, një djalë i ri që premton. Mundohem t’iu jap suport më tepër. Dajsinani ka bërë shumë mirë, në verë mund të ketë mundësi për t’u transferuar. Akoma nuk ka gjë konkrete, shpresojmë t’i gjejmë një ekip të mirë.
Lojtarët e rinj nuk duhet të zgjedhin portofolin, deri në moshën 23-vjeç duhet të shikojnë të bëjnë hapa në karrierë, paraja vjen automatikisht. E shikoj të rrezikshme që lojtarët e rinj të shikojnë paranë e madhe. Rëndësi ka minutazhi dhe që të forcohen.
Në mesfushë do të preferoja Laçin dhe Asllanin, pse jo dhe Muçin edhe si numër 8 mund ta futësh.
Sa më shumë ta ruajmë rezultatin 0 me 0, aq më shumë probleme do t’i hapim Polonisë. Mendoj se do të ketë hapësira. T’i kemi repartet e ngushta mos ketë shumë hapësira dhe të vrapojmë shumë. Me kundërsulm mund t’i ndëshkojmë. Duhen 2-3 lojtarë të shpejt. Atëherë është mjaftueshëm.
Lojtarët duhet të kenë minutazh në këmbë, do jetë lojë me intensitet, ata që kanë minuta, duhet ta bëjnë më mirë.
Po të fitojmë do të kënaqemi jashtë mase, e kam pasur gjithmonë ëndërr Botërorin.
Kombëtarja bashkon gjithë shqiptarët. Unë e ndjej veten pjesë e një trungu. Është gjëja më fantastike. Kështu duhet të jemi gjithmonë.
Shkojmë jashtëzakonisht mirë me ish-ët e Kombëtares. Kemi qenë një grup shumë i mirë edhe nga ana shoqërore. Unë e shikoj Kombëtaren si puna e Iphone-it, çdo gjë evoluon. Ne kemi pasur grup shumë të mirë, një moment më ka mbetur pishman, kur kishim Rusinë, Zvicrën, Irlandën. Aty kemi pasur fazën dhe grupin më të mirë, me Brigelin. Me pak më tepër sforco, kishim shanse që të kualifikoheshim. Grupi jonë theu disa komplekse, kur humbisnim 2-0 themi kemi luajtur mirë. Ka ndryshuar mentaliteti, kur të futesh në lojë duhet të japësh 120 %.
Marrëdhëniet me Dukën i kam pasur dhe i kam shumë të mira. Vij shpesh në Shqipëri”, përfundoi Lala. (A2 Televizion)
A2 CNN Livestream
MUND TE LEXONI GJITHASHTU
