Perla e Szoboszlai e nxjerr Arsenalin pa pikë nga “Anfield”

Kampionët në fuqi të Premier League, Liverpool, goditën në fund në "Anfield" për të mposhtur rivalët më të afërt të sezonit të kaluar, Arsenalin me rezultatin 1-0.

Ishte një fillim i pafavorshëm për mysafirët, të cilët u përballën me një dëmtim të William Saliba vetëm pesë minuta pas nisjes së ndeshjes, duke detyruar zëvendësimin e tij. Megjithatë, Arsenali krijoi rastin e parë të rrezikshëm kur Noni Madueke goditi një top të lirë në zonë, duke detyruar Alisson Becker të bëjë një pritje të mirë. Pas një gjysmë ore të parë të kujdesshme dhe të matur, një pasim i gabuar nga David Raya lejoi Virgil van Dijk të fitonte topin lart në fushë, por pa rezultat konkret.

Duke luajtur në krahun e djathtë, në mungesë të Bukayo Saka-s, Madueke ishte një kërcënim i vazhdueshëm gjatë pjesës së parë dhe këtë e vazhdoi edhe n minutat e dyta. Duke u përballur me Liverpool-in për herë të tretë në katër ndeshjet e fundit, Eberechi Eze debutoi me Arsenalin pasi hyri nga stoli së bashku me kapitenin Martin Ødegaard, por asnjëri nuk arriti të ndikojë në lojë.

Në minutën e 83’ ishte hungarezi Dominik Szoboszlai ai që shënoi një supergol nga goditja e dënimit duke e dërguar topin përtej dorës së zgjatur të Rayas.

Ky gol i vonë shënon një rekord të ri për klubin, pasi për “The Reds” është ndeshja e 37-të radhazi në Premier League që shënojnë dhe po ashtu vazhdon fillimin perfekt të sezonit për ta.

Edhe pse Arsenali zhvilloi një paraqitje të mirë si mysafir, largohet pa pikë nga Anfield Road dhe humbet terren ndaj Liverpool-it që në këtë fazë të hershme të garës për titull. (A2 Televizion)