Kërcim me shkop, Duplantis pa rivalë, medalje ari dhe rekord bote me 6,25 metër

Armand Duplantis nuk ka rivalë në kërcimin me shkop. Me një tjetër paraqitje jashtë kësaj bote, suedezi fitoi medaljen e dytë të artë radhazi në Lojërat Olimpike, ku pas Tokios triumfoi edhe në Paris. Këtë e realizoi duke vendosur një tjetër rekord bote, pasi kërceu në lartësinë 6 metër e 25 centimetër.

Ai i realizoi me sukses të katërta provat, teksa primati erdhi në tentativën e fundit. Ky është rekordi i nëntë me radhë i botës që vendos Armand Duplantis, që edhe pse vetëm 24 vjeç, prej kohësh konkurron kundër vetes.

Një jashtëtokësor i vërtetë. Për sa i takon garës mes njerëzve, vendi i dytë i takoi amerikanit Sem Kendriks, me 5 metër e 95 centimetër, ndërsa bronzi u fitua nga greku Karalis me lartësinë 5,90. (A2 Televizion)