Edhe pse shprehet pesimist për zbardhjen e aferës së inceneratorëve, Sali Berisha vijoi denoncimet për atë që e quan aferën e shekullit. Nga konferenca e përjavshme me gazetarët, Berisha deklaroi se ka njohuri për vendndodhjen dhe aktivitetin e pronarëve të inceneratorëve, Mirel Mërtiri dhe Klodian Zoto.
“Mirel Mërtiri që ndodhet në Vjenë dhe ka kërkuar azil politik ka kaluar gjykimin në Gjykatën e Shkallës së parë në Vjenë dhe gjykata ia ka refuzuar azilin politik Mirel Mërtit. Qeveria po i përgatit pasaportën atij në mënyrë që ai t'ia mbathë atje ku janë një pjesë e mirë e parave, në Zimbabve”, tha Berisha.
Ndërkohë, sa i përket pronarit tjetër të inceneratorëve, Klodian Zotos, Berisha deklaroi se ndodhet në Vlorë. “Ku është Klodian Zoto, çfarë bën? Zoto rrezatohet, bronzohet mirë e bukur në Vlorë. Kjo është vetura me të cilën shëtit Klodian Zoto dhe e kujt është thoni ju, është e Integrate Energy që tani e ka agjencia shtetërore e mbikëqyrjes së djegësit të Tiranës”.
I pyetur për çështjet e brendshme në Partinë Demokratike, Berisha deklaroi edhe njëherë se nuk do t’i shmanget votëbesimit të anëtarësisë pas humbjes në zgjedhjet e 14 majit. “Unë nuk votëbesohem në Kuvend, por në referendum. Do të caktohet një datë. U bë mbledhja e kryesisë, u bë mbledhja e Këshillit Kombëtar, u miratua rezoluta. Tani duhet të mblidhet kryesia dhe duhet të përcaktojë agjendën e veprimeve. Është i pashmangshëm. Votëbesimi është ligj absolut, kjo është”.
Sa i përket zgjedhjeve të pjesshme në Kukës, kreu i Rithemelimit deklaroi se ende nuk kanë një kandidat. (A2 Televizion)
A2 CNN Livestream
MUND TE LEXONI GJITHASHTU
