1,6 ton metamfetaminë kapet në Australi, në treg do të shitej mbi 800 mln $

Autoritetet australiane sekuestruan 1,6 tonë metamfetaminë, sasinë më të madhe të kapur ndonjëherë në portet e vendit. Ngarkesa ishte fshehur në kontejnerë me bokse audio që vinin nga Tajlanda.

Zyrtarë të Patrullës Australiane të Kufirit e zbuluan drogën kur kaluan në skaner kutitë e drurit dhe gjetën anomali. Sipas tyre, e gjithë sasia vlen thuajse 16 milionë dollarë, por kur të shitet me pakicë në rrugët e qyteteve, mund të shkojë deri në 837 milionë dollarë amerikanë. Përveç metamfetaminës, autoritetet gjetën edhe 37 kilogramë heroinë.

Vitin e kaluar, autoritetet kufitare australiane kanë kryer 43 000 operacione ku janë sekuestruar në total 11,8 tonë lëndë narkotike të paligjshme, çka e bën sasinë e sekuestruar këtë të premte të jetë më shumë se 13% e gjithë sasisë së kapur vitin e kaluar. (A2 Televizion)