Ishte larguar prej një jave nga shtëpia, gjendet i mbytur 67-vjeçari

Një i moshuar i cili ishte larguar prej një jave nga banesa është gjetur ditën e sotme i mbytur në ujërat e rezervuarit të Gjancit, 14 km larg qytetit të Korçës.

Burime të A2 CNN thanë se që nga dita e largimit nga banesa, familjarët e 67-vjeçarit Niko Ngjela kanë bërë denoncim në Policinë e Korçës për zhdukjen e të afërmit të tyre. Nga ajo ditë, policia por dhe familjarët kanë kontaktuar edhe persona të tjerë, por duket se asnjëri prej tyre nuk ka pasur informacion për të.

Burime jozyrtare thanë se kanë qenë banorë të zonës ata që kanë parë një trup në ujërat e rezervuarit dhe menjëherë kanë lajmëruar policinë, e cila ka bërë të mundur dhe nxjerrjen e trupit pa jetë nga ujërat e këtij rezervuari. (A2 Televizion)