Agjencia e barnave e Bashkimit Evropian ka deklaruar, të martën, se mund të duhen edhe katër javë për të miratuar vaksinën të parë të koronavirusit, edhe pse autoritetet në Shtetet e Bashkuara dhe Britania vazhdojnë të synojnë dritë jeshile përpara Krishtlindjeve.
Agjencia Evropiane e Barnave ka planifikuar një takim, deri më 29 dhjetor për të vendosur nëse ka mjaft të dhëna për sigurinë dhe efikasitetin në lidhje me vaksinën e zhvilluar nga Pfizer dhe BioNTech që të aprovohet. Rregullatori, gjithashtu, tha se mund të vendoste që më 12 janar nëse do të aprovonte një rival nga kompania farmaceutike amerikane Moderna Inc, e cila paraqiti kërkesën e saj te rregullatorët e SHBA-së dhe Evropës këtë javë.
Nëse vaksina e saj miratohet, BioNTech, me bazë në Gjermani, tha se përdorimi i saj në Evropë mund të fillojë para fundit të vitit 2020, por kjo duket mjaft ambicioze, duke pasur parasysh që Komisioni i BE-së duhet të vulosë vendimin e rregullatorit. Agjencia ka lënë gjithashtu të hapur mundësinë që data e atij takimi të jetë më përpara, nëse të dhënat vijnë më shpejt.
Çdo miratim i dhënë nga rregullatori evropian do të jetë i kushtëzuar nga informacionet që paraqesin kompanitë, për të konfirmuar përfitimet e vaksinës, më shumë se rreziqet.
Gjermania, e cila i ka dhënë BioNTech 375 milionë euro fonde për zhvillimin e vaksinës, është përgatitur të fillojë imunizimin e njerëzve nga mesi i dhjetorit e tutje.
Të martën, zyrtarët në Gjermani, Francë dhe Hollandë paralajmëruan që programet e vaksinave me gjasë nuk do të fillojnë deri në fund të vitit.
"Me informacionin që morëm ditët e fundit duhet të supozojmë se miratimi do të ndodhë vetëm në fund të vitit", tha ministri gjerman i Shëndetësisë, Jens Spahn.
"Është zhvendosur sepse disa studime padyshim që kërkojnë pak më shumë kohë për t'u dorëzuar", tha ai. "Ajo që ka rëndësi është të jesh i përgatitur."
Komentet e tij u përsëritën nga presidenti francez, Emmanuel Macron, dhe ministri holandez i Shëndetësisë, Hugo de Jonge, i cili tha se autoritetet në ato vende po punojnë për të filluar vaksinimin e njerëzve, në javën e parë të janarit.
"Nuk do të jetë një politikë vaksinimi për publikun e gjerë", gjatë muajve të parë, tha Macron në një konferencë shtypi.
BioNTech dhe partneri amerikan Pfizer kanë thënë se provat klinike treguan se vaksina e tyre është 95% efektive. Të dyja kompanitë kanë paraqitur tashmë të dhëna te rregullatorët në Shtetet e Bashkuara dhe Britaninë, dhe miratimi mund të vijë së pari nga ata.
Spitaleve në Angli u është thënë se mund të marrin dozat e para të Pfizer që më 7 dhjetor, nëse merr miratimin, raportuan Guardian dhe Financial Times. Këshilltarët shkencorë të Administratës Amerikane të Ushqimit dhe Barnave do të zhvillojnë një takim publik, më 10 dhjetor për të shqyrtuar kërkesën e Pfizer për të lejuar përdorimin urgjent të vaksinës së saj. (A2 Televizion)
A2 CNN Livestream
MUND TE LEXONI GJITHASHTU
