Kryetari i Partisë Demokratike, Sali Berisha, zhvilloi një bashkëbisedim “online” me shqiptarët në diasporë, ku theksoi se “pas marrjes së Presidentit, Partia Socialiste kontrollon 99,9% të pushtetit”.
“Dua të sjell para jush disa nga zhvillimet dramatike, të cilat e bëjnë kritike situatën në Shqipëri. E para, pas zgjedhjes së Presidentit, PS ka rikthyer në Shqipëri monizmin e plotë. Para zgjedhjes së presidentit, nga viti 2013, në të cilën një mazhorancë kishte gjithsej 48% të pushtetit në Shqipëri, në vitin 2020 mazhoranca arrin të ketë 91% të pushtetit në Shqipëri. Të ketë më shumë seç kishte PPSH në vitin 1991. Dhe pas zgjedhjes së Presidentit të Republikës, kjo përqindje shkon në 99,9%”, u shpreh Berisha.
Më tej, Berisha deklaroi se diaspora ka një rol të rëndësishëm në zhvillimet e vendit, ndërsa theksoi se qeveria nuk ka lejuar votën e emigracionit: "Në rrafshin politik, emigracioni dhe diaspora janë të përjashtuarit e mëdhenj nga Shqipëria. Shqipëria nuk mbyll kufijtë si dikur ndaj emigracionit e diasporës, por ajo nuk ka lejuar votën tuaj, nuk ka vendosur atë bashkëpunim të domosdoshëm për zhvillimin e saj dhe përparimin e shqiptarëve". (A2 Televizion)
A2 CNN Livestream
MUND TE LEXONI GJITHASHTU
