Fundjava nuk ishte pushim për Sali Berishën i cili vijoi akuzat ndaj Edi Ramës. Çështja Mc Gonigal, e shndërruar tashmë në kryefjalë të akuzave politike ishte lajtmotivi i fjalës së kryedemokratit në 32- vjetorin e themelimit të degës së Burrelit.
“Sot kryeministri më i korruptuar i planetit, ka përdorur të gjitha mjetet për të marrë peng opozitën. Ka përdorur agjenturë ruse, ka përdorur diplomatë të korruptuar, ka përdorur një monstër siç është Xhorxh Sorosi, për asgjësimin e PD-së. Por sot, ne jemi më të fortë se kurrë. Jemi më të fuqishëm se kurrë. Forca qëndron në idealet tona, janë idealet tona, idealet e lirisë, e drejtësisë shoqërore, e interesit kombëtar. Ato janë të përjetshme sa ç’janë kombet të përjetshme. Ato do jetojnë aq sa do jetojë kombi shqiptar. PD do mbetet besnike e përjetshme e tyre”, deklaroi Berisha.
Përfshirja e Ramës në këtë çështje është e faktuar për Sali Berishën, akt të cilin thotë se shqiptarët nuk do t’ia falin.
“Edi Rama, armik i lirisë së shqiptarëve, ia ka dalë që me taksat tuaja, me paratë tuaja, të rekrutojë, në kundërshtim me ligjet e vendit dhe SHBA, njërin nga personat më të rëndësishëm në fushën e sigurisë së asaj toke”.
Për këtë çështje, Kryetari i Partisë Demokratike ka njoftuar edhe organizimin e një proteste.
“Por ky është akt, të cilin duhet ta ndëshkojmë dhe do e ndëshkojnë shqiptarët. Shqiptarët nuk mund të pranojnë një kryeministër që angazhohet në korrupsionin botëror kundër opozitës shqiptare. Ndaj dhe sot, çdo demokrat dhe demokrate, çdo qytetar dhe qytetare e Matit, Klosit dhe gjithë Shqipërisë janë në një mision historik: përmbysjen e këtij monizmi të urryer. Përmbysjen e këtij monizmi armik të lirisë dhe shqiptarëve, përmbysjen e një njeriu që në shtatë vite përzuri 31 përqind të popullatës, çka nuk ka ndodhur në asnjë luftë, në asnjë vend përveçse në Shqipëri”. (A2 Televizion)
A2 CNN Livestream
MUND TE LEXONI GJITHASHTU
