Ashtu siç ishte paralajmëruar, veprimet e socialistëve në Parlament nuk do të kushtëzohen nga mungesa e konsensusit në Këshillin Politik me Partinë Demokratike dhe LSI-në.
Konferenca e Kryetarëve e grupeve parlamentare vendosi 1 tetorin për të miratuar ndryshimet në Kodin Zgjedhor, sipas Kushtetutës së 30 korrikut.
Socialistët depozituan dje variantin e tyre për hapjen e listave, pragun zgjedhor dhe ndalimin e koalicioneve të përbëra para zgjedhjeve. Ata duket se kanë votat e dy prej grupeve të opozitës në Kuvend.
Mazhoranca dha kohë deri të premten që kundërshtarët e kësaj nisme të depozitojnë variantin e tyre, siç është rasti i Rudina Hajdarit.
Grupi demokrat i Myslim Murrizit do të synojë një draft të unifikuar me Rudina Hajdarin. Në emër të këtij grupi, deputeti Alban Zeneli tha se drafti i socialistëve nuk i ka votat e tyre.
“Unë dhe i gjithë grupi demokrat nuk do të votojë asnjë draft, jo vetëm të PS, por të çdo lloj partie që mund të vijë në kundërshtim me Kushtetutën. Kushtetuta e miratuar më 30 korrik me një shumicë votash absolutisht nuk është ky variant. Ajo që ne kemi votuar të gjithë së bashku që vullneti i qytetarëve shqiptarë të jetë ai që shkon në kuti. Të gjithë deputetët e Kuvendit e kanë atributin personal se për kë e japin votën, apo çfarë besojnë ata”, u shpreh Zeneli. (A2 Televizion)
A2 CNN Livestream
MUND TE LEXONI GJITHASHTU
