Gazetari i A2CNN Armand Bajrami ka arritur të sigurojë detaje nga dosja hetimore e operacionit të SPAK në bashkëpunim me Eurojust, për të goditur një rrjet kriminal me 21 persona, që trafikonte drogë nga Lindja e Mesme drejt Shqipërisë dhe anasjelltas.
Në kuadër të operacionit “Nga bregu në breg”, GJKKO la sot në burg 20 prej të arrestuarve, ndërsa kanë dalë në dritë përgjimet e grupit, ku bie në sy se shpeshherë drogës i referohen si ‘vezë’.
Në përgjime trafikantët komunikojnë për oraret e kalimit në dogana, sasinë e drogës apo përshtatjen e vendit brenda kamionëve për të fshehur lëndën narkotike.
Në dosjen hetimore, një prej bisedave të transkriptuara realizohet mes trafikantit Shpëtim Pjeshka dhe punonjësve të policisë që e kalojnë kamionin e tij për skanim në vijën e dytë të pikës kufitare të Kakavijës.
Ndalimi i 63-vjeçarit nga Elbasani për kontroll në doganë është bërë në mbrëmjen e 2 qershorit 2021, kur u kapën 15 kilogramë heroinë. Droga ishte e ndarë në 30 pako.
PËRGJIMI
Artur Sulaj: Ku je ti, te kafja?
Besnik Ruçi: Unë këtu jam, i mora vezët unë, i do vezët?
Artur Sulaj: Po mirë, jo jo, mos i merr vezët se iku!
Besnik Ruçi: Po s’ja çoj dot unë?
Artur Sulaj: Po ja ta marr… po qe aty
Besnik Ruçi: Po, merre e më thuaj.
Në dosjen hetimore jepen bisedat e transkriptuara mes shtetasit Shpëtim Pjeshka, trafikant dhe punonjësve të policisë që e ndalojnë për kontroll në doganë.
Polici 1: Çfarë ke futur aty, ëëë? Çfarë ke futur.
Polici 2: Çfarë janë këto pako?
Shpëtim Pjeshka: M*t, m*t kam futur
Polici 1: M*t???
Shpëtim Pjeshka: Ëhëëëë!
Polici 2: O Nadir, prangat, prangat!
Polici 1: Ulu poshtë, ulu!
Polici 2: Hajde, ec se të ndihmoj unë!
Shpëtim Pjeshka: Ah të q**sha robt!
Polici 2: E pe skanerin Berti?
Polici 1: Nuk!
Polici 2: Si nuk mor shoku, këto janë 100 kile?!
Polici 1: Sa kile janë?
Shpëtim Pjeshka: 15…
Polici 1: Po mirë!
Në këtë moment njëri nga punonjësit e policisë (i përcaktuar në bisedën më sipër si "Polici 2"), njofton me telefon eprorin e tij ku e vë në dijeni për sasinë e drogës së kapur.
C: Aloo, po drejtor, po, po, e markoj vetë skaneri me të kuqe, ky thotë 15 kile aty ku e markoj skaneri, ka bërë një modifikim të kroskotit, heroinë, heroinë, hajde rrofsh rrofsh
C: Sa kile janë?
A: 15 pra… (A2 Televizion)
A2 CNN Livestream
MUND TE LEXONI GJITHASHTU
