Dëbimi i diplomatit, Ambasada ruse: Nuk ka prova për shkeljet e masave anti-covid

Ambasada e Rusisë në Tiranë ka reaguar ndaj vendimit të Shqipërisë për të shpallur “non grata” diplomatin ruse Alexey Krivosheev, duke u shprehur e befasuar për këtë vendim.

“Përkundër pretendimeve të Ministrisë, emri i Aleksey Krivosheev nuk është përmendur asnjëherë gjatë kontakteve midis Ambasadës Ruse dhe Ministrisë përkatëse. Për herë të parë dhe të fundit, ai është përmendur në Notën Verbale të  MEPJ-së me dt. 20.01.2021, sipas së cilës z. Krivosheev është shpallur “persona non grata”. Në të njëjtën kohë, asnjë provë e shkeljes prej tij të masave anti-covid, të vendosura në Shqipëri, nuk është sjellë”, thuhet në një reagim të Ambasadës.

“Më herët, në korrik të vitit 2020, në një takim midis Ambasadorit dhe Ministrit në Detyrë për Evropën dhe Punët e Jashtme të Shqipërisë, G. Cakaj, u ngrit çështja e pretendimeve, meqë ra fjala, gjithashtu, mjaft të diskutueshme, për sjelljen e një diplomati tjetër.

Pikërisht atëherë z. Ambasador premtoi të merrej me këtë çështje, premtim, i cili u përmbush. Vërejtje në adresë të këtij punonjësi nuk pati dhe ai u largua me sukses nga vendi pas disa muajsh, duke përfunduar shërbimin e tij”.

Ambasada thotë se Krivosheev, pasi u diagnostikua me Covid-19 në fillim të muajit nëntor 2020, në përputhje me protokollin mjekësor, ai ka qëndruar në vetizolim për dy javë me anëtarët e familjes së tij, duke respektuar rreptësishtë karantinën e përcaktuar, dhe ka dalë në punë vetëm pasi ka kaluar dy teste negative. Kontakte të jashtme, përveç vizitës në institucionet mjekësore për të kryer testet përkatëse, ai nuk ka pasur, thotë Ambasada.

“Ne besojmë se akuzat kundër tij janë të pabazuara dhe të sajuara. Në sfondin e kësaj ngjarjeje, sigurimet e palës shqiptare në lidhje me përpjekjet e saj në drejtim të zhvillimit të marrëdhënieve miqësore midis vendeve tona ngjallin dyshime. Gjithashtu, drejtojmë vëmendjen tuaj te fakti se, në përputhje me praktikën diplomatike ndërkombëtare, emrat e punonjësve të misioneve diplomatike të shpallur “persona non grata” nuk i komunikohen publikut. Kjo është, ndër të tjera, një nga detyrimet e vendit pritës, me qëllim ruajtjen e sigurisë personale të diplomatëve dhe anëtarëve të familjes së tyre. Publikimi i emrave mund të ndodhë, vetëm pasi punonjësi është larguar nga vendi pritës”. (A2 Televizion)