Policia e Tiranës ka arrestuar në flagrancë presidentin e klubit të futbollit Kastrioti, Alban Vogli dhe drejtorin teknik Gazmend Vogli për incidentet që u shënuan ditën e shtunë gjatë ndeshjes së futbollit Tirana-Kastrioti.
Presidenti i Kastriotit dhe drejtuesi tjetër i saj, gjatë zhvillimit të ndeshjes Tirana – Kastrioti, hynë në fushën e lojës duke shkaktuar tension dhe ndërprerjen e ndeshjes për disa minuta dhe më pas kanë goditur dy punonjës policie për të shmangur shoqërimin e tyre.
Dy të arrestuarit akuzohen për “Kundërshtim i punonjësit të policisë së rendit publik” e kryer në bashkëpunim, dhe “Veprime të dhunshme në aktivitete sportive” të kryera në bashkëpunim.
Tirana fiton 1-0 mes polemikave me Kastriotin. Shkak u bë goli i Hoxhallarit, teksa gjatë aksionit një lojtar i krutanëve ishte i shtrirë në tokë.
Ky episod bëri që të regjistroheshin përplasje, me drejtuesit e Kastriotit që hynë në terrenin e lojës, ndërsa loja u ndërpre edhe për disa minuta pasi ekipi mik braktisi fushën.
Tensioni vijoi edhe në tunelin që dërgon ekipet drejt dhomave të zhveshjes. (A2 Televizion)
A2 CNN Livestream
MUND TE LEXONI GJITHASHTU
