Në gati 100 vjet marrëdhënie, politika shqiptare ka pasur përplasjet e saj me Uashingtonin. Por Shtetet e Bashkuara vazhdojnë ta gëzojnë statusin e aleatit strategjik, pavarësisht akuzave të lëshuara hera-herës ndaj përfaqësuesve të saj në Tiranë.
Futje hundesh apo ndihmë? “Nëse ne kemi sot ekzistencën e shtetit shqiptar, e kemi me mbështetjen e SHBA-ve. Ne mund të fantazojmë dhe të themi se SHBA-të ndërhyjnë në punët e brendshme të Shqipërisë, por kjo është si për të qeshur, ashtu edhe për të qarë”, shprehet Roland Qafoku, gazetar e studiues.
“Ka qenë një domosdoshmëri prania e tyre dhe ndërhyrja e tyre edhe pse dikush ose shumëkush i kanë parë këto ndërhyrje si cenim të sovranitetit, me të padrejtë, sipas meje”, thotë Alfred Lela, politiko.al.
E fundit në radhën e ambasadorëve amerikanë të akredituar në Tiranë është Yuri Kim, e 20-ta që prej vendosjes së marrëdhënieve diplomatike.
Pritshmëritë ndaj saj duket se janë të larta. Qafoku e Lela janë në një mendje mbi sfidën e parë që diplomatja amerikane do të ketë në Tiranë.
“Përfundimi i reformës në drejtësi ose mbajtja e fokusit mbi këtë njollë drite që ajo të mos hijezohet”, thotë Lela.
“Rezultatet e para të reformës në drejtësi. Unë jam besimplotë që ajo ka për ta fituar këtë bast të madh”, thotë Qafoku.
Por jo çdo gjë është në dorën e amerikanëve. Lajmi i rënies së Shqipërisë në perceptimin e korrupsionit, është një nga ata shembuj, sipas analistëve, ku Qeveria duhet të jetë aktori kryesor.
“Mendoj se duhet të heqim dorë nga iluzioni se ambasadorët amerikane do të na i zgjidhin të gjitha këto gjëra. Nuk do të jetë kështu, por të paktën një mekanizëm kontrolli plus”, shprehet Lela.
“Kim nuk do të jetë Kryeministre e Shqipërisë. Ajo do të mbështesë reformën në drejtësi, por lufta ndaj korrupsionit nuk bëhet vetëm me SPAK-un, bëhet edhe nga qeveria. Ajo nuk do të marrë dhe do të dënojë njerëz. Pastaj, kjo do të ishte për të qeshur”, shprehet Qafoku. (A2 Televizion)
A2 CNN Livestream
MUND TE LEXONI GJITHASHTU
