Në pritje të vendimit të Lulzim Bashës, pas kërkesës së shumicës së grupit Parlamentar të partisë Demokratike për dorëheqje, sot pasdite ndodhi një tjetër zhvillim në kampin opozitar. I dërguari i posaçëm i qeverisë gjermane për Ballkanin Perëndimor, Manuel Sarrazin qe po viziton Tiranën, nuk takoi Lulzim Bashën dhe nga Partia Demokratike zyrtare, takimin e zhvilloi me kreun e grupit parlamentar dhe nënkryetarin, Enkelejd Alibeaj. Por jo vetëm kaq, i dërguari i kancelarit Sholz zhvilloi takim edhe me palën tjetër në PD, me përfaqësuesin e Foltores ose Komisionit te Rithemelimit, Genc Pollo.
Vlen të përmendet se ky është takimi i parë që ndërkombëtarët, dhe gjermanët, zhvillojnë me përfaqësuesit e Foltores në këto muaj. Ky takim vjen pas 6 marsit.
Ndërkaq lëvizjet kanë nisur nga dje. Elmar Brok, ish-eurodeputet gjerman i CDU-së dhe sot anëtar i CDU-së, e cila është pjesë e Partisë Popullore Evropiane është takuar me Sali Berishën dhe Belind Këlliçin, ku fokusi i bisedimeve ishte zgjidhja e krizës në PD. Ndërkohë nga PD zyrtare, Brok mësohet se ka takuar kreun demokrat Lulzim Basha, i cili rikonfirmoi se mbete në dispozicion për të bërë gjithçka për hir të demokratëve dhe për të bashkuar PD-në.
Genc Pollo, përfaqësues nga Komisioni i Rithemelimit të PD, i pyetur në Debat nga Alba Alishani në A2 CNN nëse takimet e sotme me Manuel Sarrazin do të thoshin se Gjermania ka njohur tashmë Foltoren, ai u shpreh: “Opozita reale në vend është Partia Demokratike legjitime, ajo që drejtohet nga komisioni i përkohshëm i Rithemelimit dhe çdo shtet demokratik do ta njohë këtë. Natyrisht që janë peripecitë që duhen mbyllur një orë e më parë që kanë qenë të pakëndshme për demokratët. Uroj që në orët e fundit që kalojnë të shqiptohet ajo fjala që fillon me gërmën “D” dhe të kalojmë në një normalitet demokratik. Të gjithë e dinë se ajo gjëja që drejton Basha nuk është opozitë dhe dorëheqja do të ishte gjëja më e mirë në këto rrethana”, tha Pollo. (A2 Televizion)
A2 CNN Livestream
MUND TE LEXONI GJITHASHTU
