Arben Ahmetaj është zyrtarisht në kërkim nga drejtësia shqiptare për aferën e inceneratorëve. Gjykata e Posaçme firmos urdhër-arrestin për ish-zv.kryeministrin, Arben Ahmetaj. Ndaj tij është caktuar masa e sigurisë "arrest në burg" në mungesë.
Urdhri i është dorëzuar nga SPAK për ekzekutim Policisë së Shtetin. Me marrjen në dorë të urdhrit, Policia e Shtetit bën kërkime në gjithë vendin. Më pas, me marrjen e konfirmimit nga të 12 drejtoritë vendore të qarqeve për mosgjetjen e Ahmetajt, vijohet procedura për shpalljen e tij në kërkim ndërkombëtar.
Pak ditë më parë, me 117 vota pro, Kuvendi miratoi kërkesën për heqjen e mandatit të deputetit Arben Ahmetaj.
Ish-numri dy i qeverisë Rama akuzohet për refuzim për deklarim, fshehje ose deklarim i rremë i pasurive, korrupsionit pasiv dhe aktiv i funksionarëve të lartë shtetërorë dhe pastrim të produkteve të veprës penale, vepra penale nga të cilat mund të dënohet deri në 15 vite burg.
Avokati i Arben Ahmetajt, Henrik Ligori zbuloi për mediat se klienti i tij aktualisht ndodhet në Angli, ku po qëndron pranë familjes së tij. Në lidhje me pyetjen a do të kthehet, ish-zv.kryeministri për t’u përballur me drejtësinë, Ligori u shpreh se Ahmetaj do të vijë në Shqipëri kur të ketë lirinë.
Nga ana tjetër, ndonëse pa imunitet për të njëjtën dosje në kërkim ndërkombëtar u shpallën dhe pronarët e kompanive fituese të tenderave të inceneratorëve, Stela Gugallja, Mirel Mertiri dhe Klodian Zoto, vendndodhja e të cilëve nuk dihet. (A2 Televizion)
A2 CNN Livestream
MUND TE LEXONI GJITHASHTU
