Është një prej serialeve më të ndjekura në Shtetet e Bashkuara të Amerikës, por rrallëherë aktorët apo producentët kandidohen për ndonjë çmim. Bëhet fjalë për serialin “Yellowstone”, me aktor protagonist Kevin Costner, i cili do të hyjë së shpejti në sezonin e pestë, pasi ka thyer disa rekorde shikueshmërie.
Rreth 15 milionë persona, panë live episodin final të sezonit të katërt, duke thyer kështu një rekord të vendosur në vitin 2017, nga premiera e sezonit të tetë të serialit “The Walking Dead”.
I nisur në vitin 2018, “Yellowstone” flet për Amerikën rurale, për shtetet “e kuqe”, siç quhen ato që votojnë kryesisht për Partinë Republikane. Por përkundër mosvlerësimit nga ana e kritikës, seriali i ka thyer këto barriera duke “pushtuar” të gjithë vendin.
I prodhuar nga “Paramount”, seriali tregon jetën e një familjeje fermerësh në Montana, por problemet mes të bardhëve dhe indianëve nativë, ndërthuren me intrigat politike lokale, larg Uashingtonit, apo qendrave të tjera liberale amerikane, si Nju-Jorku dhe Los Anxhelosi.
Me një fotografi magjepsëse që ofrohet nga Parku Kombëtar i Yellowstone, seriali tregon jetën reale të shtresës së mesme amerikane, diçka që ndoshta i mungonte ekraneve dhe platformave online. Autorët e serialit e thonë më së miri idenë e tyre për atë që po ndodh sot në Shtetet e Bashkuara, me fjalët që personazhi kryesor, John Dutton, i luajtur nga Kevin Costner, thotë në episodin e shtatë në sezonin e katërt: “Po zhvillohet një luftë kundër mënyrës sonë të jetesës. Po na e morën tokën, nuk do të duket më kurrë si toka jonë”.
Përveç Costner, dy herë fitues i çmimit Oscar, në serialin dramatik interpretojnë edhe emra të tjerë të njohur si Luke Grimes, Kelly Reilly, Wes Bentley dhe Cole Hauser. (A2 Televizion)
A2 CNN Livestream
MUND TE LEXONI GJITHASHTU
