Komisionet hetimore për inceneratorët dhe Becchettin mund të vonohen, por nuk do të pengohen dot. Kështu u shpreh kreu demokrat Lulzim Basha në një konferencë për mediat, ku theksoi se Rama përdori shtetin në një luftë personale me Bechetin që kushton 120 milionë euro.
“Për komisionin Becheti, Edi Rama u tregua i prerë, duke na thënë se duhet ta harrojmë ngritjen e tij, sepse sipas Edi Ramës vendimi është i “mbuluar nga konfidencialiteti” dhe publikimi i tij dëmton interesat e Shqipërisë. Gënjeshtër qesharake. Vendimi është publik. Rama përdori shtetin në një luftë personale që kushton 120 milionë euro”.
Basha tregoi vendosmërinë e opozitës se do të ndërmarrë të gjitha hapat për ngritjen e komisionit hetimor për çështjen Bechetti.
“Do të ndërmamrrin të gjitha hapat që komisioni Bechetti të nisë dhe të zbardhë këtë aferë dhe të çojë para drejtësisë përgjegjësit".
Basha e akuzoi Ramën se kërkon t’ i çojë paratë tek inceneratorët, referuar deklaratës së djeshme të kryeministrit me kryetarët e bashkive.
“E nëse për mafien e inceneratorëve po kërkojnë riformulim të kërkesës tonë, në përpjekje për ta kthyer atë që duhet të jetë një komision hetimor, në një pseudo-grup pune për mjedisin, ndërkohë Rama shantazhoi jo më larg se dje krerët e bashkive për t’i çuar mbetjet te inceneratorët me pronarë offshore, për të furnizuar me paratë e qytetarëve llogaritë bankare në parajsat fiskale”.
Ai njoftoi se java e ardhshme është e fundit për rifomulimin e kërkesës së inceneratorëve dhe theksoi se nuk do të lejojë që shndërrohet në grup pune për mjedisin.
"Java e ardhshme është java e fundit e zemërgjerësisë opozitare për riformulimin e kërkesës për inceneratorët. Nuk do të lejojmë që të shndërrohet në grup pune për mjedisin, ne nuk bëjmë asgjë për interesin tonë por atë publik. Lidhjet e tyre me politikën do të hetohen deri në fund”.
Sa i takon komisionit hetimor për zgjedhjet e 25 prillit, Basha tha se pavarësisht përpjekjeve për sabotim ai do të vazhdojë punën për të penguar përsëritjen e gërshetimit të partisë, shtetit, krimit dhe oligarkisë.
“Komisioni Hetimor për masakrën zgjedhore është ngritur dhe pavarësisht përpjekjeve për ta sabotuar atë, vijon dhe ne do ta çojmë deri në fund zbardhjen e asaj që ndodhi me votën e shqiptarëve, me qëllim krijimin e të gjitha kushteve të domosdoshme për të penguar përsëritjen lidhjes të shtetit, krimit dhe oligarkisë si një nyje në fytin e demokracisë shqiptare. Mbetet një prioritet absolut i yni dhe do të vazhdojë. Nuk do të lejojmë ta ndalim punën e këtij komisioni, që është i domosdoshëm për të penguar përsëritjen e gërshetimit të partisë, shtetit, krimit dhe oligarkisë si një nyje në fytin e shqiptarëve”. (A2 Televizion)
A2 CNN Livestream
MUND TE LEXONI GJITHASHTU
