Një sasi e konsiderueshme kanabis sativa është sekuestruar nga policia në sajë të finalizimit me sukses të operacionit të koduar “Uraka 2”.
Policia njofton se ka goditur një grup të strukturuar kriminal që vepronte në fushën e trafikut të narkotikëve, në një bashkëveprim mes Drejtorisë Vendore të Policisë së Elbasanit dhe Forcave Operacionale të Policisë së Shtetit. Në total janë arrestuar 8 persona dhe një tjetër është shpallur në kërkim, pas sekuestrimit të 578 kg kanabis, tri automjeteve, 14 aparateve celularë dhe 5.800 euro.
Ndërhyrja e policisë nisi të mërkurën 21 nëntor, rreth orës 10 në fshatin Urakë, të njësisë administrative Rrajcë të Bashkisë Përrenjas, ku është ndaluar dhe bllokuar një automjet furgon “Iveco”, me drejtues shtetasin A.B. Brenda tij u gjetën 578 kg kanabis, që u sekuestrua në cilësinë e provës materiale.
Por, policia bllokoi edhe dy automjete të tjera të marra me qira nga pjesëtarët e grupit në qytetin e Fierit, me të cilat shoqëronin automjetin furgon. Veç automjeteve janë ndaluar edhe shtetasit A.C. dhe E.H., të cilët drejtonin automjetet shoqëruese.
Të arrestuarit janë E.M. 27 vjeç dhe A.C. (T.) 39 vjeç nga Fieri; A.B. (42 vjeç) nga Levani; E.H. 43 vjeç dhe G.R. 42 vjeç nga Elbasani; E.Gj. 42 vjeç nga Pogradeci, A.Q. 24 vjeç nga Korça dhe L.D. 34 vjeç nga Tirana. Në kërkim u shpall shtetasi A. M., banues në Elbasan. Ata akuzohen tashmë për “trafikim të narkotikëve” dhe “grup të strukturuar kriminal”, vepra për të cilat do të procedohen nga Prokuroria pranë Gjykatës së Shkallës së Parë për Krimet e Rënda në kryeqytet. (A2 Televizion)
A2 CNN Livestream
MUND TE LEXONI GJITHASHTU
