Lera shpjegon se si përcaktohen çmimet nga Bordi i Transparencës

Niko Lera, anëtar i Bordit të Çmimeve në Ministrinë e Financave, i ftuar në studion e “A2 Business”, shpjegoi se si përcaktohen çmimet nga ky bord.

“Rritja e çmimeve në vendin tonë është reflektim i rritjes së çmimeve në nivel ndërkombëtar, i rritjes së çmimeve të karburanteve apo dhe i mungesës së furnizimit nga zonat e luftës, siç janë Rusia dhe Ukraina. Nuk është krizë e brendshme dhe nuk lidhet me spekulime në tregje. Bordet janë krijuar për të kontrolluar 3-4 artikuj jetikë për popullatën, që të shmangen abuzimet me çmimet për këto produkte”, tha Lera.

Më tej, Lera theksoi se bordi vetëm “ka përcaktuar disa marzhe, që mbulojnë shpenzimet operacionale të subjekteve dhe qëllimi është që të mos ketë fitime jonormale në këtë situatë”.

“Janë llogaritur këto marzhe në bazë të bilanceve të viteve të kaluara. Pasi kemi marrë koston e blerjes së mallit dhe taksat e doganës, kemi aplikuar marzhet dhe duke patur parasysh marzhet e importuesit, ambalazhuesit dhe tregtarit me pakicë, kemi kaluar në një çmim final”, u shpreh Lera.

Ndërkohë, Mira Pogaçi, drejtore ekzekutive e “Bashkimit të Tregtarëve të Shqipërisë”, u shpreh se ka patur edhe abuzime gjatë kësaj periudhe.

“Kur ka një abuzim, tregu reagon menjëherë. Ndiqet trendi i rritjes sepse situata për furnizimet ka qenë e paqartë për të gjithë. Tani, çështja nuk është vetëm te 3-4 produkte. Kemi një vendim të Këshillit të Ministrave, që përcakton se produktet bazë dhe ato të lidhura me to do të jenë pjesë e monitorimit, por nuk përcakton se kush janë këta produkte. Aktet ligjore duhet të jenë sa më të qarta”, deklaroi Pogaçi. (A2 Televizion)