Shqiptarët kanë liri ekonomike më të mëdha se sa francezët dhe italianët, edhe pse vetëm në letër. Ky është konkluzioni që nxjerr raporti i “Heritage Foundation”, që mat çdo vit të drejtat që kanë qytetarët e 177 shteteve të botës mbi biznesin, pronën dhe punën e tyre.
Në këtë indeks, Shqipëria ka përmirësim këtë vit dhe me 66.6 pikë, renditet e 50-ta, më mirë se sa të gjitha vendet e rajonit dhe shtete si Franca dhe Italia, dy vende të G7-s, që renditen përkatësisht në vendin e 52-të dhe 57-të. Madje, në indikatorë të caktuar, si rëndesa e taksave, shpenzimet qeveritare, liria e tregtisë dhe liria monetare, ia kalojmë edhe Gjermanisë. Me barrën tatimore veçanërisht si një aspekt me të cilin kryeministri Rama ka ftuar shpesh investitorët në vend.
Në brendësi të raportit megjithatë, theksohet se të bërit biznes në Shqipëri është e vështirë.
“Praktikat informale të biznesit dhe proceset e parregullta të prokurimeve publike kontribuojnë në pasiguritë e biznesit. Kodet e punës nuk zbatohen në mënyrë të njëtrajtshme. Pjesa informale në punësim është më e larta në rajon”.
Raporti i “Heritage Foundation”
Raporti evidenton edhe probleme të tjera të shumta, si mbrojtja e dobët e pronës, manipulimi i drejtësisë dhe presioni i politikës dhe kërcënimeve në sistemin gjyqësor.
Integriteti i qeverisë vlerësohet ndjeshëm nën mesataren botërore, më keq se shtete të konsideruara diktatura si Ruanda dhe Bjellorusia. Ndërsa rritja ekonomike cenohet nga korrupsioni endemik, burokracia, shtrembërimi i konkurrencës dhe mungesa e transparencës.
“Me papunësi të lartë, rritje të plogësht dhe infrastrukturë të dobët, Shqipëria mbetet një nga vendet më të varfra të Europës”.
Raporti i “Heritage Foundation”
Por sërish, shqiptarët janë më të lirë ekonomikisht sesa francezët dhe italianët. (A2 Televizion)
A2 CNN Livestream
MUND TE LEXONI GJITHASHTU
