Presidentja e Kosovës, Vjosa Osmani, falenderoi Shtetet e Bashkuara të Amerikës për kontributin e dhënë në lirimin e 3 policëve të rrëmbyer nga forcat serbe. Kryetarja e shtetit, gjatë një takimi me guvernatoren e shtetit të Iowa, Kim Reynolds, nënvizoi se aleanca e Prishtinës me Uashingtonin vijon të mbetet ekzistenciale për Kosovën.
“Shpreh falënderimet e përzemërta për kontributin që kanë dhënë Shtetet e Bashkuara të Amerikës për lirimin e tre policëve të Republikës së Kosovës, të cilët po mbaheshin të kidnapuar pas aktit të agresionit që Serbia kishte kryer ndaj Republikës së Kosovës. Ata tashmë janë të lirë duke u kthyer në Republikën e Kosovës dhe tek familjet e tyre. Për Republikën e Kosovës aleanca me ShBA-në vazhdon të mbetet ekzistenciale. Qytetarët tanë janë populli më proamerikan në botë, prandaj, siç i shpreha guvernatores në Kosovë, ju gjithnjë do të jeni miq dhe partner të përkushtuar. Marrëdhëniet bilaterale ndërmjet Kosovës dhe ShBA-së janë të rrënjosura në vlera të përbashkëta dhe angazhimin tonë për demokraci, sundim të ligjit, paqe dhe siguri në vend dhe rajon”, tha Osmani. (A2 Televizion)
A2 CNN Livestream
MUND TE LEXONI GJITHASHTU
