Në vigjilje të festave, 3800 udhëtarë hyjnë në Durrës vetëm të dielën

Në vigjilje të festave të fundvitit është rikthyer fluksi i udhëtarëve që hyjnë në vendin tonë nëpërmjet Pikës Kufitare të  Portit të Durrësit.

Me 3 tragetet e linjave Bari-Durrës dhe Ankona-Durrës, janë rreth 3800 udhëtarë dhe 460 mjete që  pritet të hyjnë në vendin tonë nga kjo pikë kufitare vetëm gjatë kësaj të diele.

Policia Kufitare po punon me kapacitet të plotë, me 20 sportele në funksion të udhëtarëve dhe mjeteve të tyre.

Ky fluks vjen pas vendimit të autoriteteve italiane, për klasifikimin e Italisë në " zonë e kuqe" duke kufizuar lëvizjet e  qytetarëve nga data 24 dhjetor deri në 6 janar të vitit të ardhshëm.

Ndërkohë që është rritur survejanca nga ana e Sektorit të Epidemiologjisë në APD për monitorimin e gjendjes shëndetësore të udhëtarëve në momentin e mbërritjes së tyre në Portin e Durrësit. Përveç deklarimeve që qytetarët bëjnë pranë autoriteteve italiane në nisjen e tyre, protokollet shëndetësore aplikohen edhe në mbërritjen e tyre. (A2 Televizion)