Nën “pushtetin” e ujit, Shkodra më e goditura nga moti i keq

Nga Shkodra në Gjirokastër, përfshirë Lezhën, Fierin, Bulqizën, Durrësin, Elbasanin apo Kukësin, reshjet e shiut kanë rikthyer imazhet e përmbytjeve me njerëz të izoluar në banesat e tyre.

Kryesisht në Shkodër, janë disa familje, banesat e së cilave rrezikojnë të përmbyten. Në hyrje të qytetit, në “Harkun e Bërdicës” është ndaluar edhe qarkullimi i automjeteve si pasojë e nivelit të lartë të ujit.

Në Malësinë e Madhe kanë nisur evakuimin. Në “Grykë Lugje”, në njësinë administrative Shkrel të Malësisë së Madhe, rrjedha e ujit ka marrë përpara një makinë në të cilën ndodheshin tre persona, banorë të zonës, babai, djali dhe vajza. Kjo e fundit ka mundur të dalë, ndërsa kanë nisur kërkimet për babain dhe djalin.

Si pasojë e rritjes së nivelit të ujit, hidrocentralet e Komanit e Vaut të Dejës në kaskadën e Drinit kanë hapur portat, ndërsa në Gjirokastër ka pasur ndërprerje të energjisë elektrike. Ndërkohë në Qafë Thore janë shënuar reshjet e para të borës. (A2 Televizion)