Koronavirusi vendos në rrezik 305 milionë vende pune me kohë të plotë në të gjithë botën brenda tremujorit të dytë të këtij viti. Vlerësimi vjen nga Organizata Ndërkombëtare e Punës, sipas së cilës zgjatja e periudhës kohore të masave kufizuese ka përkeqësuar parashikimin e mëhershëm, të rreth 200 milionë vendeve të punës.
Ky organ i Kombeve të Bashkuara paralajmëron gjithashtu se pandemia rrezikon t’u shkatërrojë burimin e mbështetjes së jetesës më shumë se 1.5 milirdë personave në të gjithë planetin.
Vendet e punës në informalitet janë më në rrezik, shumë prej tyre janë në sektorin e shitjes me pakicë, industrinë e prodhimit dhe shërbimin ushqimor.
“Ajo që ne gjejmë në raport në këtë monitorim është se kemi 2 miliardë punëtorë informalë në botë, ku rreth 1.6 miliardë kanë pësuar dëme masive në aftësinë e tyre për të fituar jetesën dhe për të mbështetur veten dhe familjet e tyre për shkak të krizës aktuale COVID-19”, u shpreh Guy Ryder, Drejtor i Përgjithshëm i Organizatës Ndërkombëtare të Punës.
Sipas raportit, 2 miliard punonjës informalë kanë pësuar ulje të pagës me rreth 60% gjatë muajit të parë të përhapjes së pandemisë.
“Për miliona punonjës, mungesë të ardhurash do të thotë mungesë ushqimi, sigurie dhe të ardhmeje”, shton kreu i Organizatës Ndërkombëtare të Punës. Ryder thotë gjithashtu se miliona biznese mezi po mbijetojnë dhe nënvizon se nëse ato nuk ndihmohen në këtë periudhë të vështirë rrezikojnë të zhduken. (A2 Televizion)
A2 CNN Livestream
MUND TE LEXONI GJITHASHTU
