Përplasja për furnizimin me vaksina, BE dhe Astrazeneca zotohen për bashkëpunim

Përplasja për furnizimin me vaksina BE dhe Astrazeneca zotohen për bashkëpunim. Pas përshkallëzimit të përplasjeve mes vonesave në prodhimin e dozave të vaksinës, Bashkimi Europian dhe kompania Astra Zeneca me bazë në Britaninë e Madhe, zbusin tonet dhe angazhohen të bashkëpunojnë për zgjidhjen e mosmarrëveshjeve. Pas bisedimeve të zhvilluara mes Brukselit dhe përfaqësuesve të Astrazeneca-s, komisionerja për shëndetësinë, Stella Kyriakides, shprehu keqardhjen për mungesën e vazhdueshme të transparencës lidhur me afatet e dërgesave. 

Stella Kyriakides: Do të punojmë me kompaninë për të gjetur zgjidhjet e për t’i shpërndarë sa më shpejt vaksinat për shtetasit e BE.

Sipas kontratës së nënshkruar me Brukselin, Astrazeneca duhej të dërgonte rreth 100 milionë doza të vaksinës deri në muajin mars, por për shkak të problemeve në prodhim, siç pretendon, njoftoi një reduktim deri në 25 milionë doza.

Bashkimi Europian i kërkon kompanisë të devijojë dozat e destinuara për Britaninë e Madhe. Por, kjo e fundit, e cila e ka nënshkruar marrëveshjen me Astrazeneca-n përpara Bashkimit Europian, e bëri të qartë se dozat e saj nuk preken.  

Nuk do të ketë ndërprerje të furnizimeve për Britaninë e Madhe, tha ministri Michael Gove, ndërsa Astra Zeneca u zotua të përmbushte detyrimin ndaj Londrës, për 2 milionë doza në javë.

Ndërkaq, rregullatorët belgë nisën një hetim në fabrikën e Astra Zenecas pranë Brukselit, me kërkesë të Komisionit Europian.

Siç bëri të ditur ministri i Shëndetësisë belge, një vizitë e parë e inspektorëve të agjencisë së ilaçeve u zhvillua të mërkurën. Kampionë dhe të dhëna u morën nga fabrika ku prodhohet vaksina dhe inspektime të tjera priten në vazhdim.  (A2 Televizion)