Spanja është përfshirë nga një valë protestash dhe grevash, në atë që konsiderohet greva e parë e përgjithshme në 14 vite. Transporti dhe shërbimet publike janë përballur me ndërprerje të konsiderueshme, pas thirrjes së sindikatave për protesta kundër kostos së lartë të jetesës dhe krizës së strehimit.
Greva ka prekur veçanërisht Madridin dhe rajonin e Katalonjës, ku janë raportuar bllokime të rrugëve kryesore dhe ndërprerje në aktivitetin industrial. Ndërkohë, demonstrata të mëdha janë zhvilluar në disa qytete të vendit.
Kreu i sindikatës UGT, Pepe Álvarez, e cilësoi grevën një sukses me pjesëmarrje masive, ndërsa përfaqësuesi i sindikatës CC OO, Unai Sordo, e konsideroi pjesëmarrjen shumë domethënëse. Nga ana tjetër, Konfederata Spanjolle e Organizatave të Biznesit pretendoi se pjesëmarrja ishte e ulët dhe e pabarabartë mes sektorëve dhe zonave të ndryshme.
Një nga shkaqet kryesore të revoltës është rritja e çmimeve të banesave dhe qirave. Sipas të dhënave të portalit Idealista, qiraja mesatare mujore për një apartament 50 metra katrorë në Madrid arriti në 1,170 euro në tetor, një shifër që përfaqëson pothuajse gjysmën e pagës mesatare bruto mujore në Spanjë.
Pakënaqësia u përshkallëzua edhe pas dëbimit të 87-vjeçares Maricarmen Abascal nga apartamenti ku kishte jetuar për 70 vite. E moshuara u përball me trefishimin e qirasë pas ndryshimit të pronësisë së banesës dhe ndërroi jetë në spital disa javë pas dëbimit.
Greva vjen në një moment të rëndësishëm politik për Spanjën, pak më shumë se dy javë përpara zgjedhjeve parlamentare të 29 nëntorit. Kryeministri socialist Pedro Sánchez ka mbrojtur të drejtën e punonjësve për të protestuar, ndërsa opozita konservatore e ka akuzuar qeverinë se po e përdor grevën për përfitime elektorale. (A2 Televizion)
A2 CNN Livestream
MUND TE LEXONI GJITHASHTU
