Irani ka rinisur një pjesë të prodhimit të dronëve gjatë armëpushimit gjashtë-javor që filloi në fillim të prillit, një shenjë se po rindërton me shpejtësi disa aftësi ushtarake të degraduara nga sulmet amerikane-izraelite, sipas dy burimeve të njohura me vlerësimet e inteligjencës amerikane. Katër burime i thanë CNN se inteligjenca amerikane tregon se ushtria e Iranit po rindërtohet shumë më shpejt sesa ishte vlerësuar fillimisht, përcjell A2 CNN.
Rindërtimi i kapaciteteve ushtarake, duke përfshirë zëvendësimin e vendeve të raketave, lançuesve dhe kapacitetit të prodhimit për sistemet kryesore të armëve të shkatërruara gjatë konfliktit aktual, do të thotë që Irani mbetet një kërcënim i rëndësishëm për aleatët rajonalë nëse presidenti Donald Trump rifillon fushatën e bombardimeve. Kjo gjithashtu vë në pikëpyetje pretendimet rreth shkallës në të cilën sulmet amerikane-izraelite e kanë degraduar ushtrinë e Iranit në planin afatgjatë, shkruan A2 CNN.
Ndërsa koha për të rifilluar prodhimin e përbërsve të ndryshëm të armëve ndryshon, disa vlerësime të inteligjencës amerikane tregojnë se Irani mund të rindërtojë plotësisht aftësinë e tij për sulme me dronë brenda gjashtë muajsh, tha për CNN një nga burimet, një zyrtar amerikan.
“Iranianët i kanë tejkaluar të gjitha afatet kohore që kishte IC për rindërtimin”, tha zyrtari amerikan.
Sulmet me dronë janë një shqetësim i veçantë për aleatët rajonalë. Nëse armiqësitë rifillojnë, Irani mund të rrisë aftësinë e tij të prodhimit të raketave, e cila është degraduar ndjeshëm, me më shumë lëshime dronësh, për të vazhduar të qëllojë Izraelin dhe vendet e Gjirit që janë brenda rrezes së veprimit të të dy sistemeve të armëve, raporton A2 CNN.
Trump ka kërcënuar vazhdimisht se do të rifillojë operacionet luftarake kundër Iranit nëse të dy vendet nuk arrijnë një marrëveshje për t'i dhënë fund luftës, duke përfshirë edhe deklaratën publike të martën se ai kishte qenë një orë larg rifillimit të bombardimeve, që do të thotë se këto aftësi ushtarake mund të hyjnë në lojë. (A2 Televizion)
A2 CNN Livestream
MUND TE LEXONI GJITHASHTU
