Franca ka akuzuar agjencinë e inteligjencës ushtarake ruse GRU për orkestrimin e sulmeve kibernetike që synojnë agjencitë qeveritare franceze, kompanitë dhe Lojërat Olimpike të Parisit.
Sipas një raporti të publikuar të martën nga agjencia franceze e sigurisë kibernetike (ANSSI), GRU ka përdorur grupin famëkeq të hakerave APT28, i njohur edhe si Fancy Bear, për të synuar ose kompromentuar dhjetëra entitete franceze që nga viti 2021.
Shënjestrat përfshinin ata në hapësirën ajrore, financat, ministritë e qeverisë kombëtare dhe qeveritë lokale, si dhe një organizatë sportive të lidhur me planifikimin e Lojërave Olimpike dhe Paralimpike të Parisit 2024, thanë ANSSI dhe ministria e jashtme e Francës.
Sipas raportit, sulmet kibernetike synonin mbledhjen e të dhënave të inteligjencës, veçanërisht në kontekstin e pushtimit në shkallë të plotë të Ukrainës nga Rusia.
Të martën, ministri i Jashtëm Francez Jean-Noël Barrot tha në X se Franca “vëzhgon, bllokon dhe lufton kundërshtarët e saj” dhe postoi një video në lidhje me “luftën e heshtur” të zhvilluar nga Rusia kundër Francës.
Ministria e Jashtme franceze tha se “sulmet kibernetike të APT28 ndaj vendit datojnë që nga viti 2015, kur stacioni TV5 Monde u nxor jashtë funksionit nga një sulm i madh kibernetik”.
Parisi tha gjithashtu se grupi i hakerëve ishte përpjekur të destabilizonte zgjedhjet franceze në vitin 2017, kur mijëra email-e dhe dokumente të lidhura me kandidatin e atëhershëm dhe fituesin përfundimtar, Emmanuel Macron, u zbuluan dhe u përhapën së bashku me dezinformimin.
Raporti i ANSSI-t përmendi gjithashtu sulme të paspecifikuara ndaj subjekteve në Ukrainë, në Evropë dhe Amerikën e Veriut.
APT28 dhe GRU janë lidhur gjithashtu me sulme kibernetike globale të profilit të lartë, përfshirë zgjedhjet e vitit 2016 në SHBA, ku u akuzuan për rrjedhjen e emaileve të Partisë Demokratike.
“Këto aktivitete destabilizuese janë të papranueshme dhe të padenja për një anëtar të përhershëm të Këshillit të Sigurimit të OKB-së. Krahas partnerëve të saj, Franca është e vendosur të përdorë të gjitha mjetet në dispozicion për të parashikuar, dekurajuar dhe reaguar ndaj sjelljes keqdashëse të Rusisë në hapësirën kibernetike”, tha Ministria e Jashtme Franceze në një deklaratë.
Ambasada e Rusisë në Paris dhe Kremlini ende nuk kanë komentuar mbi gjetjet e raportit.
(A2 Televizion)
A2 CNN Livestream
MUND TE LEXONI GJITHASHTU
