Bashkëkryetarja e Alternativës për Gjermaninë (AfD), Alice Weidel, ka kritikuar ashpër kancelarin gjerman Friedrich Merz gjatë një seance në Bundestag, duke e akuzuar atë për “vetëkënaqësi” dhe “mohim të realitetit”, sidomos në politikat e migracionit, të jashtme dhe të mbrojtjes.
Duke folur para Merz-it, Weidel deklaroi se “qytetarët po humbin durimin” dhe kërkoi një ndryshim rrënjësor në qasjen e qeverisë. Ajo iu referua fjalës së famshme të ish-kancelares Angela Merkel në vitin 2015, “Ne ia dalim”, duke thënë se pasojat e saj po ndihen ende sot.
“Mbyllni kufijtë plotësisht dhe pa përjashtim. Refuzoni emigrantët e paligjshëm pa dokumente të vlefshme dhe ata që nuk kanë të drejtë për azil, pa përjashtim. Natyralizimi pas dhjetë vitesh, më herët jo”, tha ajo.
Kreu i AfD-së akuzoi Merz për thyerje të çdo premtimi elektoral në fushën e energjisë, taksave dhe financave publike. Ajo shtoi se kancelari, përballë rënies së mbështetjes popullore, po përpiqej të dukej si lider global, duke u shfaqur krah presidentit francez Emmanuel Macron dhe kryeministrit britanik Keir Starmer, “të cilët as popujt e tyre nuk i duan më në detyrë”.
Weidel gjithashtu kritikoi qëndrimin e qeverisë gjermane ndaj luftës në Ukrainë, duke e akuzuar për “sabotim të planeve të Presidentit amerikan Donald Trump për t’i dhënë fund konfliktit”, ndërsa inkurajonte Kievin të mos bënte lëshime ndaj Moskës. Sipas saj, paralajmërimet për një “sulm të afërt rus” po përdoren si justifikim për rritjen e shpenzimeve publike.
Në fjalën e saj, ajo bëri edhe një homazh për aktivistin konservator amerikan Charlie Kirk, i vrarë së fundmi në SHBA.
Sulmet e Weidel ndaj kancelarit Merz vijnë në një moment të tensionuar politikisht, teksa qeveria po përballet me kritika mbi politikat e migracionit dhe menaxhimin e ekonomisë, ndërsa AfD po përfiton nga pakënaqësia e elektoratit në sondazhe. (A2 Televizion)
A2 CNN Livestream
MUND TE LEXONI GJITHASHTU
