Irani ka deklaruar se Shtetet e Bashkuara nuk janë pjesë e bisedimeve që po zhvillohen me Omanin për rihapjen e Ngushticës së Hormuzit, duke hedhur poshtë raportimet për një rol të drejtpërdrejtë të Uashingtonit në negociata.
Sipas transmetuesit shtetëror iranian IRIB, një burim i informuar ka bërë të ditur se diskutimet mes Teheranit dhe Muskatit “nuk kanë të bëjnë fare me Shtetet e Bashkuara”.
Deklarata vjen pasi zyrtarë të lartë amerikanë folën për përparim në përpjekjet diplomatike. Sekretari amerikan i Shtetit, Marco Rubio, tha se është shënuar “përparim” në bisedimet lidhur me Ngushticën e Hormuzit, ndërsa Sekretari i Thesarit, Scott Bessent, u shpreh se një marrëveshje mund të arrihet “sot ose nesër”.
Ndërkohë, analistët vlerësojnë se, edhe nëse arrihet një marrëveshje për rihapjen e Ngushticës së Hormuzit, ajo nuk do të mjaftojë për të zgjidhur tensionet më të gjera mes Iranit dhe Perëndimit.
Ngushtica e Hormuzit mbetet një nga rrugët më strategjike të transportit të naftës në botë, ndërsa zhvillimet rreth saj vijojnë të ndikojnë në tregjet ndërkombëtare të energjisë dhe në situatën e sigurisë në Lindjen e Mesme. (A2 Televizion)
A2 CNN Livestream
MUND TE LEXONI GJITHASHTU
