Kabineti i sigurisë i Izraelit miratoi unanimisht gjatë natës planin për të zgjeruar ofensivën ushtarake kundër Hamasit në Rripin e Gazës, edhe pse shefi i ushtrisë thuhet se i paralajmëroi ministrat se kjo mund të rrezikonte pengjet e mbajtura atje.
Mediat izraelite bëjnë të ditur se ky plan pritej të zbatohej vetëm pas vizitës së Presidentit të SHBA-së Donald Trump në rajon javën e ardhshme, dhe deri atëherë, përpjekjet do të vazhdojnë për të arritur një armëpushim dhe një marrëveshje për pengjet me Hamasin.
Plani është gradual dhe përqendrohet fillimisht në një zonë të caktuar, të paspecifikuar brenda Rripit, përpara se të zgjerohet në vende të tjera, raportoi të dielën transmetuesi publik Kan, duke shtuar se luftimet intensive pritej të vazhdonin për muaj të tërë.
Përveç kësaj, kabineti i sigurisë miratoi një plan për të rinovuar shpërndarjen e ndihmave në Gaza, ndërkohë që rishikon mekanizmin në mënyrë që të minimizojë devijimin e mallrave nga Hamasi në dobi të operativëve të tij. Ministri i Sigurisë Kombëtare, Itamar Ben Gvir, ishte i vetmi që votoi kundër planit, i cili do të zbatohej kur ta kërkonte situata në Gaza.
Plani, i raportuar për herë të parë nga The Times of Israel të premten, do të kërkonte që IDF të hiqte dorë nga shpërndarja me shumicë dhe magazinimi i ndihmave dhe në vend të kësaj do t'u kërkonte organizatave ndërkombëtare dhe kontraktorëve privatë të sigurisë të shpërndanin kuti me ushqim familjeve individuale në Gaza. (A2 Televizion)
A2 CNN Livestream
MUND TE LEXONI GJITHASHTU
