Irani sfidon Shtetet e Bashkuara, ndërsa një grup sulmues ushtarak amerikan është pozicionuar në Lindjen e Mesme. Qeveria e Teheranit njofton se lëvizja e një anijeje luftarake e SHBA-ve nuk do të zvogëlonte vendosmërinë ose aftësinë e tij për të mbrojtur veten, pas paralajmërimit të Presidentit Donald Trump për një “armadë” amerikane në rajon, shkruan A2. Një zëdhënës i Ministrisë së Jashtme, u tha gazetarëve se Irani do të përgjigjet “me vendosmëri” ndaj çdo kërcënimi.
“Është shumë e qartë se si do të përgjigjemi. Siç e kemi treguar më parë, përballë çdo agresioni apo kërcënimi, do të përgjigjemi me vendosmëri, me forcë të plotë dhe në një mënyrë gjithëpërfshirëse. Sa i përket detajeve, ky nuk është as vendi dhe as fusha ime e ekspertizës për t'i diskutuar ato. Forcat tona të armatosura kanë mësuar mirë se si të mbrojnë territorin e Iranit”, tha Esmaeil Baghaei, zëdhënës i Ministrisë së Jashtme.
Ndërkohë, videot e verifikuara nga BBC që dolën nga Irani tregojnë trupa të grumbulluar në një spital, snajperë të vendosur në ndërtesa dhe kamera sigurie që shkatërrohen, pas shtypjes së paprecedentë të protestave në fillim të këtij muaji. Agjencia e Lajmeve të Aktivistëve të të Drejtave të Njeriut (HRANA) me seli në SHBA thotë se ka konfirmuar vrasjen e gati 6,000 personave, përfshirë 5,633 protestues, që nga fillimi i trazirave në fund të dhjetorit.
Ajo thotë se po heton gjithashtu 17 mijë vdekje të tjera të raportuara, pavarësisht një mbylljeje të internetit gati tre javore. Një grup tjetër, Organizata për të Drejtat e Njeriut në Iran (IHR) me seli në Norvegji, ka paralajmëruar se numri përfundimtar i të vdekurve mund të kalojë 25 mijë. Autoritetet iraniane thanë javën e kaluar se më shumë se 3100 njerëz u vranë, por pretenduan se shumica ishin personel sigurie ose kalimtarë të sulmuar nga “protestuesit”. (A2 Televizion)
A2 CNN Livestream
MUND TE LEXONI GJITHASHTU
