Shtëpia e Bardhë po shqyrton mundësinë e nënshkrimit të marrëveshjeve ekonomike me Rusinë përpara përfundimit të luftës në Ukrainë.
Kështu shkruan “New York Times”, duke cituar “dy burime pranë bisedimeve”. Sipas NYT, kjo bie ndesh me qasjen e mbështetur deri tani, sipas së cilës vetëm presioni më i madh ekonomik dhe ushtarak ndaj presidentit rus, Vladimir Putin, mund ta detyrojë atë të bëjë kompromise.
Megjithatë, SHBA-të besojnë se bashkëpunimi ekonomik mund të bëhet një prej mjeteve për të avancuar negociatat dhe për të bindur elementët antiamerikanë në rrethin e Putinit se Trump dëshiron të vendosë marrëdhënie të reja.
Sipas NYT, bëhet fjalë për marrëveshje të mundshme që Uashingtoni mund të lidhë me Moskën, pavarësisht nëse arrihet apo jo një marrëveshje e plotë paqeje për Ukrainën. Kjo pasqyron dëshirën e Trump për të vijuar njëkohësisht negociatat me Kremlinin dhe për të kërkuar mundësi për rivendosjen e marrëdhënieve ekonomike me Rusinë.
Megjithatë, brenda administratës amerikane nuk ka një dakordësi unanime lidhur me shpejtësinë me të cilën duhet të arrihen marrëveshje të tilla me Moskën. Disa zyrtarë besojnë se ofrimi i stimujve ekonomikë ndaj Rusisë përpara përfundimit të luftës mund të dobësojë aftësinë e saj për të ushtruar presion mbi Kremlinin.
Sipas “New York Times”, ndër fushat e mundshme të bashkëpunimit që po shqyrtohen janë energjia, investimet dhe sektorë të tjerë ku kompanitë amerikane dhe ruse mund të rifillojnë potencialisht bashkëpunimin.
Në të njëjtën kohë, çdo marrëveshje serioze ekonomike do të varet nga regjimi i sanksioneve amerikane. Disa kufizime ndaj Rusisë mbeten në fuqi, ndërsa një nismë e re në Kongresin amerikan parashikon presione të mëtejshme ndaj sektorit energjetik rus dhe burimeve të tjera të të ardhurave të Kremlinit.
(A2 Televizion)
A2 CNN Livestream
MUND TE LEXONI GJITHASHTU
