Në vijën e zjarrtë të frontit lindor të Ukrainës, ku qielli dominohet nga dronët dhe çdo lëvizje mund të zbulohet brenda sekondash, lufta moderne po zhvillohet mes baltës, tymit dhe maskimit perfekt. Në rajonin e Dnipropetrovskut, njerëzit e artilerisë së Ukrainës, të Brigadës së 148-të, po përpiqen të mbajnë larg avancimin rus, duke goditur pozicionet armike me obusët amerikanë M777.
Në heshtjen e pyjeve, një tërheqje litari mjafton për të shpërthyer ferrin. Predhat nisen drejt objektivave ruse, ndërsa ushtarët punojnë me ritëm të pandalur për të rimbushur armët dhe për të korrigjuar koordinatat e sulmit.
“Shumicën e kohës godasim strehimet ku ndodhen trupat armike, sistemet e artilerisë dhe ndonjëherë objektiva në lëvizje”, thotë një artilier 29-vjeçar me nofkën “Kep”.
Në këtë luftë, ku teknologjia ka ndryshuar gjithçka, beteja nuk fitohet vetëm me armë të rënda. Dronët patrullojnë vazhdimisht qiellin, duke kërkuar çdo gabim, çdo lëvizje të pambrojtur. Pikërisht për këtë arsye, maskimi është bërë arma më e fortë e mbijetesës.
“Në këtë fazë të luftës, maskimi përcakton 90 për qind të suksesit. Nëse maskohesh mirë, askush nuk të gjen”, thotë “Kep”, ndërsa ushtarët fshehin obusin nën pemë dhe rrjeta anti-dron.
Pas breshërisë së predhave, vjen një moment i shkurtër qetësie. Ushtarët hanë shpejt pranë pozicioneve të tyre, lajnë enët dhe përpiqen të marrin frymë mes lodhjes dhe tensionit. Por edhe ato pak minuta pushimi ndërpriten nga zhurma e një droni që kalon mbi kokat e tyre. Sytë ngrihen menjëherë drejt qiellit, ndërsa frika për një goditje të menjëhershme mbetet gjithmonë e pranishme.
Megjithatë, për këta ushtarë, tërheqja nuk është opsion.
“Do të qëndrojmë këtu, sepse jemi këtu për të mbrojtur familjet tona, prindërit, gratë dhe fëmijët tanë. Ne sigurohemi që armiku të mos shkojë më tej”, thotë 28-vjeçari Stanislav.
Në predhat që përgatiten për zjarr, ushtarët shkruajnë emrat e shokëve të rënë në luftë. Një kujtesë se çdo goditje është edhe hakmarrje, edhe mbijetesë.
Ndërsa nata bie mbi rrugët me baltë të frontit ukrainas, autokolonat lëvizin në errësirë nën rrjetat anti-dron, duke u përpjekur të mbeten të padukshme në një luftë ku ai që zbulohet i pari, shumë shpesh, nuk mbijeton. (A2 Televizion)
A2 CNN Livestream
MUND TE LEXONI GJITHASHTU
