Teherani tha se armiqtë e tij, të mbështetur nga një shtet i paidentifikuar në rajon, po përgatiten të pushtojnë Kharg-un, një nga ishujt kyç të tij, në një kohë kur ka raportime se Pentagoni po dërgon mijëra trupa elitare në rajon, raporton A2CNN.
“Forcat tona po monitorojnë të gjitha lëvizjet e armikut dhe, nëse ata dalin jashtë vijës, e gjithë infrastruktura jetësore e atij vendi rajonal, pa kufizim, do të bëhet objektiv i sulmeve të pamëshirshme”, tha Kryetari i Parlamentit, Mohammad Bagher Ghalibaf.
Paralajmërimi vjen mes spekulimeve në rritje se forcat amerikane mund të pushtojnë ishullin Kharg, qendrën kryesore të eksportit të naftës së Iranit në Gjirin Persik verior, i cili përpunon 90% të eksporteve të naftës së vendit.
Shqetësimet për një operacion të mundshëm tokësor janë intensifikuar pas raportimeve se Pentagoni po përgatitet të vendosë 2,000 trupa shtesë nga një njësi sulmi ajrore në rajon.
Në të njëjtën kohë, Shtëpia e Bardhë ka kërcënuar se Tehrani do të përballet me “ferrin” nëse nuk arrin një marrëveshje me Uashingtonin.
Mediat perëndimore kishin raportuar më parë se SHBA-të janë përpjekur të krijojnë një mekanizëm armëpushimi njëmujor me Iranin dhe se Presidenti i SHBA-ve Donald Trump ka kërkuar një dalje nga lufta dhe i ka dërguar Teheranit një plan me 15 pika për t’i dhënë fund konfliktit.
Teherani i ka quajtur bisedimet me Uashingtonin "të palogjikshme" në këtë pikë, duke shtuar se kërkon një zgjidhje të përhershme dhe jo një armëpushim të përkohshëm që më parë ka çuar në "goditje pas shpine". (A2 Televizion)
A2 CNN Livestream
MUND TE LEXONI GJITHASHTU
